12 ஆண்டுகளில் 11 மாநிலங்கள் விவசாயிகளுக்கான நில உச்சவரம்பு சட்டங்களை தொழில்துறைக்கு சாதகமாக மாற்றின

இந்த 11 மாநிலங்கள் ஆந்திரா, குஜராத், ஹரியானா, கர்நாடகா, மத்தியப் பிரதேசம், மகாராஷ்டிரா, பஞ்சாப், ராஜஸ்தான், தமிழ்நாடு, உத்தரகண்ட் மற்றும் மேற்கு வங்கம் ஆகும். இவற்றில் ஆறு, கடந்த மூன்று ஆண்டுகளில் திருத்தங்களைச் செய்துள்ளனர், மேலும் 2020 இல் மட்டும் இரண்டு மாநிலங்கள் திருத்தம் செய்தது, இதில் விரைவான போக்கைக் குறிக்கிறது.

இரண்டு மாநிலங்களான கர்நாடகா மற்றும் குஜராத் ஆகியவற்றில் இந்தத் திருத்தங்கள் நில உரிமையாளர்கள் மற்றும் நிலமற்ற விவசாயக் குழுக்களுக்கு இடையே ஆர்ப்பாட்டங்களுக்கு வழிவகுத்தன, திருத்தங்களை திரும்பப் பெற வேண்டும் என்றும் நிலமற்றவர்களுக்கு உபரி நிலங்களை ஒதுக்க வேண்டும் என்றும், அக்குழுக்கள் கோரியுள்ளன.

நில சீர்திருத்தங்களில் இந்தியாவின் முயற்சிகள் நீண்ட வரலாற்றைக் கொண்டுள்ளன. சுதந்திரத்திற்குப் பிறகு, 1960 ஆம் ஆண்டுகளில் தொடங்கி, 21 மாநிலங்கள் இந்தியாவில் நில உரிமையில் வரலாற்று ஏற்றத்தாழ்வுகளை நிவர்த்தி செய்வதற்காக நில சீர்திருத்தச் சட்டங்களை இயற்றின. ஒரு தனிநபர் அல்லது நிறுவனம் எவ்வளவு நிலத்தை வைத்திருக்க முடியும் என்பதற்கு சட்டங்கள் ஒரு வரம்பை நிர்ணயிக்கின்றன, இது நிலம் 'உச்சவரம்பு' என்றும் அழைக்கப்படுகிறது, மேலும் நிலமற்றவர்களுக்கு உபரி நிலத்தை மறுபகிர்வு செய்ய அரசை அனுமதித்தது.

நிலச்சீர்திருத்தங்களின் நோக்கம் நிறைவு செய்யப்படாவிட்டாலும், புதிய திருத்தங்கள் இந்த பாதுகாப்புகளை மாற்றியமைத்தன. முன்னதாக, 2013 ஆம் ஆண்டில், தேசிய நிலசீர்திருத்தக் கொள்கை வரைவு மாநிலங்கள் நில உச்சவரம்புகளைக் குறைத்து நிலமற்ற ஏழைகளுக்கு உபரி நிலங்களை விநியோகிக்க வேண்டும் என்று மீண்டும் வலியுறுத்தியது. ஆனால் நிலம் என்பது மாநிலம் சார்ந்த ஒரு பொருளாக இருப்பதால், மாநில அரசுகள் மத்திய அரசின் பரிந்துரைகளுக்கு உட்பட்டவை அல்ல என்பது குறிப்பிடத்தக்கது.

இந்த திருத்தங்கள் நில சீர்திருத்த நிகழ்வில் ஒரு "யு-டர்ன்" மற்றும் நிலங்கள் மற்றும் குறு விவசாயிகளின் நலனுக்காக சட்டங்கள் இனி இல்லை என்பதைக் காட்டுவதாக, நில உரிமைகள் தொடர்பாக செயல்படும் இலாப நோக்கற்ற ஏக்தா பரிஷத்தின் பொதுச் செயலாளரும், மத்திய அரசின் நில சீர்திருத்தங்கள் தொடர்பான தேசிய பணிக்குழுவின் உறுப்பினருமான ரமேஷ் சர்மா இந்தியாஸ்பெண்டிடம் தெரிவித்தார்.

தொழில்கள் மற்றும் ரியல் எஸ்டேட் திட்டங்கள் போன்ற இந்த திருத்தங்களால் பயனாளிகளில் கூட, பெரிய நிறுவனங்கள் மட்டுமே பயனடைகின்றன என்று தொழிலதிபர்கள் மற்றும் சமூக விஞ்ஞானிகள் எங்களிடம் தெரிவித்தனர்.

2014 முதல் திருத்தங்களின் சீற்றம்

கடந்த 2014ஆம் ஆண்டுக்கு முந்தைய தசாப்தத்தில், மூன்று மாநிலங்கள் மட்டுமே அவற்றின் உச்சவரம்புச் செயல்களைத் திருத்தியதாகத் தெரிகிறது (கீழே உள்ள அட்டவணையைப் பார்க்கவும்). 2009 ஆம் ஆண்டில் ஆந்திரா உச்சவரம்பு நிலங்களை, தொழிற்சாலைகளுக்கு விற்க அனுமதித்தது; 2014 ஆம் ஆண்டில் ஆந்திராவில் இருந்து பிரிக்கப்பட்ட தெலுங்கானா மாநிலத்திற்கும், இதே சட்டம் பொருந்தும். ராஜஸ்தான் எந்தவொரு நபருக்கும் 2010ஆம் ஆண்டில் விவசாய சாரா நோக்கங்களுக்காக உபரி நிலம் உள்ளிட்ட விவசாய நிலங்களை கையகப்படுத்த அனுமதித்தது. நகர்ப்புற மற்றும் தொழில்துறை மண்டலங்களில் விவசாயம் சாரா நிலங்களின் உரிமையின் வரம்பை நீக்குவதற்காக, 2011 ஆம் ஆண்டில், ஹரியானா அதன் நில உரிமையாளர்களுக்கான உச்சவரம்பு-1972ஐ திருத்தியது.

தொழில்துறை மற்றும் ரியல் எஸ்டேட் உள்ளிட்ட விவசாயம் சாரா நோக்கங்களுக்காக நில பயன்பாட்டை செயல்படுத்த அரசியல் சட்டங்கள் முழுவதையும்,மாநிலங்கள் திருத்தியுள்ள நிலையில், 2014 முதல் திருத்தங்களின் வேகம் துரிதப்படுத்தப்பட்டுள்ளது.

பெரும்பாலான மாநிலங்கள் விவசாய நிலங்களை வாங்குவதற்கு அல்லது அத்தகைய நிலத்தை முன்பை விட பெரிய பார்சல்களில் வைத்திருக்க அனுமதித்துள்ளன, இல்லையெனில் அவை நிலம் கையகப்படுத்தல், மறுவாழ்வு மற்றும் மீள்குடியேற்றம் சட்டம்-2013 இல் நியாயமான இழப்பீடு மற்றும் வெளிப்படைத்தன்மை மூலம் பெற வேண்டும். 2020இல் ராஜஸ்தானின் திருத்தப்பட்ட புதுப்பிக்கத்தக்க எரிசக்தி திட்டங்களுக்கான மசோதா ஒரு சிறப்பு ஏற்பாடு செய்தது.

கர்நாடகாவில், 2015 ஆம் ஆண்டில் சித்தராமையா தலைமையிலான காங்கிரஸ் அரசு, விவசாய நிலங்களை வாங்குபவரின் அதிகபட்ச வருமானத்தை ரூ.2 லட்சத்தில் இருந்து ரூ.25 லட்சமாக உயர்த்தியபோது, திருத்தங்கள் தொடங்கியது. பின்னர், 2020 நவம்பரில் பி.எஸ். எடியூரப்பா தலைமையிலான பாரதிய ஜனதா கட்சி, இந்த வரம்பை முற்றிலுமாக நீக்கியது. மாநில வருவாய்த்துறை அமைச்சர் ஆர்.அசோகா, மாற்றங்களை அறிவிக்கும்போது, ​​அரசு "கொடுமைகள் முடிவடைந்து, நிலம் வாங்கும் செயல்முறை இனி விவசாயிகள் அல்லாதவர்களுக்கும் கூட மென்மையாக இருக்கும் வகையில் சட்டத்தை திருத்துவதாக" கூறினார். அசோகா, அண்டை மாநிலமான தமிழ்நாடு மற்றும் ஆந்திராவில் இதேபோன்ற திருத்தங்களை சுட்டிக்காட்டினார். இவை அந்த மாநிலங்களில் முதலீட்டாளர்களை ஈர்க்கின்றன என்று கூறினார். நில உரிமையின் வரம்பை இரட்டிப்பாக்க கர்நாடகா 2020 பிப்ரவரியில் மற்றொரு திருத்தத்தை முன்மொழிந்தது, ஆனால் எதிர்க்கட்சிகள் மற்றும் விவசாயிகள் குழுக்களின் எதிர்ப்பால், பின்னர் அது திரும்பப் பெறப்பட்டது.

குஜராத், முதன்முதலில் 2015 ஆம் ஆண்டில் தனது சட்டத்தில் திருத்தம் செய்ய முயன்றது, உபரி நிலங்களை தொழில்களுக்கு ஒதுக்க அனுமதித்தது. விவசாய உற்பத்தியை பாதிக்கும் என்று கூறி இரண்டு முறை மசோதாக்களை மத்திய அரசு திருப்பி அளித்தது. மற்ற நிலங்களுக்கு ஈடாக மட்டுமே உபரி நிலங்களை தொழில்களுக்கு ஒதுக்குவதாக, அரசு இறுதியாக கூறியது. இந்தத் திருத்தம் 2018ஆம் ஆண்டில் நிறைவேற்றப்பட்டது.

தொழில்துறை வளர்ச்சியை ஊக்குவிப்பதன் மூலம் மாநிலத்தில் "வணிகத்தை எளிதாக்குவதற்கு" ஏற்ப வணிக பயன்பாட்டிற்கான நில உச்சவரம்பு அதிகரிப்பு இருக்கும் என்று, தமிழ்நாட்டின் திருத்த மசோதா தெரிவித்துள்ளது.

கடந்த 2013 ஆம் ஆண்டில், கிராம மேம்பாட்டு அமைச்சகத்தின் (MoRD) முன்முயற்சியால் உருவாக்கப்பட்ட நில சீர்திருத்தங்களுக்கான மத்திய தேசிய பணிக்குழு, தேசிய நில சீர்திருத்த வரைவுக் கொள்கையை உருவாக்க உதவியது, இது மாநிலங்களில் ஐந்து முதல் 15 ஏக்கர் வரை ஒரே மாதிரியான உச்சவரம்பை முடிவு செய்ய பரிந்துரைத்தது. விவசாய நிலங்களின் தரம் மற்றும் உற்பத்தித்திறனை அடிப்படையாகக் கொண்டது. நிலமற்ற மக்களுக்கு நிலத்தை ஒதுக்க மாநில அரசுகள் விரிவான கொள்கைகளை உருவாக்க வேண்டும் என்று கொள்கை பரிந்துரைத்தது. எவ்வாறாயினும், வரைவு இறுதி செய்யப்படவில்லை, மேலும் அரசியலமைப்பின் கீழ் நிலம் ஒரு மாநிலப் பொருளாக இருப்பதால், எந்தவொரு கொள்கையையும் மத்திய அரசால் செயல்படுத்த முடியாது.

கிராம மேம்பாட்டு அமைச்சகத்தின் நில வளத்துறையின் இணை இயக்குநர் ஜி.எல். குப்தா, இந்தியாஸ்பெண்டிற்கு பேட்டியளித்தபோது, ​​இந்த திருத்தங்களை அமைச்சகம் கண்காணிக்கவில்லை என்றார்.

'நில சீர்திருத்தங்களை மாற்றியமைத்தல்'

பழைய நில உச்சவரம்பு சட்டங்கள், ஏற்கனவே விலக்குகளின் நீண்ட பட்டியலுடன் வந்தன, இதன் விளைவாக ஒரு சிறிய சதவீத நிலத்தை மட்டுமே உபரி என்று அறிவித்து விநியோகிக்க முடியும் என்று, கவுஹாத்தியின் தேசிய சட்ட பல்கலைக்கழகம் மற்றும் நீதித்துறை அகாடமியின் சட்டப் பேராசிரியர் இஷ்ரத் ஹுசைன் கூறினார்; அவர் உச்சவரம்பு சட்டங்களுக்கான விலக்குகளை ஆய்வு செய்துள்ளார். "இதற்கு முன்னர் படிப்படியாக செய்யப்படுவது இப்போது கடுமையாக செய்யப்படுகிறது," என்று அவர் இந்தியாஸ்பெண்டிடம் தெரிவித்தார்.

"இந்த திருத்தங்கள் நில சீர்திருத்தங்களின் வெளிப்படையான தலைகீழானது" என்று ஏக்தா பரிஷத்தின் சர்மா கூறினார். விலக்குகள் மற்றும் செயலற்ற தன்மை மூலம் நில சீர்திருத்த சட்டங்களை மாநிலங்கள் ஏற்கனவே பலவீனப்படுத்திய பின்னர் இந்த திருத்தங்கள் வந்துள்ளதாக தெரிவித்தார்.

கடந்த 2015 ஆம் ஆண்டு நிலவரப்படி, இந்தியாவின் விவசாய நிலங்களில் மூன்றில் ஒரு பங்கு மொத்த மக்கள்தொகையில் 4.9% மற்றும் ஒரு பெரிய நில உரிமையாளர் பொதுவாக ஒரு சிறிய விவசாயி செய்த நிலத்தின் பரப்பளவில் ஒப்பிட்டால், சராசரியாக 45 மடங்கு சொந்தமாக வைத்துள்ளார் என்று, இந்தியாஸ்பெண்ட் மே 2016 கட்டுரை தெரிவித்துள்ளது.

தமிழ்நாடு, குஜராத், மேற்கு வங்கம் மற்றும் மகாராஷ்டிரா (இவை அனைத்தும் தங்களது நில சீர்திருத்த சட்டங்களை திருத்தியுள்ளன) ஆகியவற்றில் தலித் மக்களுக்கு நிலமற்ற சூழலை அதிக அளவில் கொண்டுள்ளன என்று மத்திய அரசின் நிலம் மற்றும் கால்நடை வளர்ப்பு ஆய்வு-2013 தெரிவித்துள்ளது.

தமிழ்நாட்டிற்கு வளம் சேர்க்கும் காவிரி டெல்டா பிராந்தியத்தில், பல நில உரிமையாளர்கள் தங்களது உபரி நிலத்தை தலித்துகளுக்கு விநியோகிக்க அரசிடம் ஒப்படைப்பதற்கு பதிலாக சட்டவிரோதமாக தனியாருக்கு விற்றதாக, 100-க்கும் மேற்பட்ட அடிமட்ட இயக்கங்களின் பெருங்குழுவான தலித் நில உரிமைகள் இயக்கத்தின் தேசிய கூட்டமைப்பின் தலைவர் வின்சென்ட் மனோகரன் கூறினார். இதுபோன்ற அனைத்து சட்டவிரோத விற்பனையையும் முறைப்படுத்த மாநில அரசு 2020 நவம்பரில் உத்தரவு பிறப்பித்தது.

குஜராத்தில், தலித் மற்றும் ஆதிவாசி நில உரிமை ஆலோசனை குழுக்களின் வலையமைப்பான ஜமீன் ஆதிகார் ஜும்பேஷ், மாநிலத்தின் திருத்தங்களுக்கு உபரி நிலங்களுக்கு உரிமைகோரல்களை தாக்கல் செய்வதற்கான மாநில அளவிலான பிரச்சாரம் வாயிலாக பதில் தந்தது. "அரசின் வாதம் (திருத்தத்தை அறிமுகப்படுத்தியதற்காக) நிலத்திற்கு எந்த கோரிக்கையும் இல்லை, எனவே அவர்களுக்கு ஒரு லட்சம் விண்ணப்பங்கள் கிடைத்தன" என்று இயக்கத்துடன் தொடர்புடைய ஆராய்ச்சியாளர் முகேஷ் லகம், இந்தியாஸ்பெண்டிடம் தெரிவித்தார்.

கர்நாடகாவில் அண்மையில் நடந்த ஆர்ப்பாட்டங்களும், உபரி நிலங்களை விநியோகிக்கக் கோரியதாக கர்நாடகாவில் சாதி எதிர்ப்பு மனித உரிமைகள் குழுவான சஞ்சயா நெலேவின் அழைப்பாளரும், நிறுவனருமான பி.யசோதா இந்தியாஸ்பெண்டிடம் தெரிவித்தார். இந்த குழு, ஏழு மாதங்களுக்கு முன்பு உபரி நிலங்களை விநியோகிக்க மாநில அரசுக்கு ஒரு மனுவை அனுப்பியதாகவும், இன்னும் பதிலல் கிடைக்கவில்லை என்றும் அவர் கூறினார்.

கர்நாடகாவில் நில உரிமை விவசாயிகளும் டிசம்பர் உட்பட 2020 முழுவதும் திருத்தங்களுக்கு எதிராக போராட்டங்களை நடத்தியுள்ளனர்.

"விவசாயம் ஏற்கனவே ஒரு நெருக்கடியை எதிர்கொள்கிறது. உச்சவரம்பு சட்டங்கள், குறைந்தபட்சம், விவசாயிகள் விவசாய நிலப்பரப்பில் இருப்பதை உறுதி செய்தன," என்று, இந்திய கம்யூனிஸ்ட் கட்சியின் (மார்க்சிஸ்ட்) ஒரு பிரிவான அகில இந்திய கிசான் சபையின் மாநிலப் பிரிவான கர்நாடக பிரதான சங்கத்தின் தலைவர் பேயரெட்டி, இந்தியாஸ்பெண்டிடம் தெரிவித்தார். "இந்த திருத்தங்கள் விவசாயிகள் ஓரங்கட்டப்படுவதற்கு வழிவகுக்கும்" என்றார்.

பெரிய தொழில்களே பயனடைகின்றன

இந்த திருத்தங்கள் பெரிய தொழில்களுக்கான "தடைகளை" நீக்குகின்றன என்று, டெல்லியை சேர்ந்த தொழில்துறை மேம்பாட்டு ஆய்வுகளுக்கான உதவி பேராசிரியரும், இந்திய தொழில்துறை கூட்டமைப்பின் முன்னாள் ஆலோசகருமான ராமா அருண்குமார் இந்தியாஸ்பெண்டிடம் தெரிவித்தார். மாநில சட்டங்களின் மாற்றங்கள் பெரிய தொழில்களுக்கான பொருளாதாரங்கள் மூலம் தொழில்துறை உற்பத்தித்திறனை உயர்த்தும், அதேபோல் சிறிய நில உரிமையாளர்கள் விவசாய உற்பத்தித்திறனைக் குறைத்துள்ளதாக குமார் கூறினார். "நிலம் மற்றும் வளங்களைப் பொறுத்தவரை சிறு தொழில்களுக்கு இன்னும் அரசின் ஆதரவு தேவைப்படும்" என்றார்.

"சிறு மற்றும் நடுத்தர நிறுவனங்கள் (SME) விவசாய நிலங்களை விட வளர்ந்த நிலங்களை விரும்புகின்றன, ஏனெனில் அவர்களுக்கு நீர் மற்றும் மின்சாரம் போன்ற பிற வசதிகள் தேவைப்படுகின்றன, மேலும் விவசாய நிலங்களுக்கு அந்த மூலத்தை உருவாக்குவது கடினம்," என்று, இந்தூரில் உள்ள "சிறு மற்றும் நடுத்தர நிறுவனங்களின் குழுவான பிதாம்பூர் ஆத்யோகிக் சங்கத்தின் தலைவர் கவுதம் கோத்தாரி இந்தியாஸ்பெண்டிடம் தெரிவித்தார். மத்தியப் பிரதேசம் தனது திருத்தங்களை போதுமான அளவில் வெளியிடவில்லை, எனவே சில நிறுவனங்கள் இதுவரை விவசாய நிலங்களை வாங்கியுள்ளன என்று கோத்தாரி கூறினார்.

மகாராஷ்டிராவின் திருத்தம் -- இது, ரியல் எஸ்டேட் திட்டங்களால் புதிய நகரங்களுக்கு விவசாய நிலங்களை வைத்திருப்பதற்கான 54 ஏக்கர் வரம்பை ரத்து செய்தது -- பெரிய கார்ப்பரேட் கட்டடதாரர்களுக்கு பயனளிக்கும் என்று இந்திய ரியல் எஸ்டேட் டெவலப்பர்கள் சங்கங்களின் கூட்டமைப்பின் நவி மும்பை பிரிவின் அரவிந்த் கோயல் கூறினார். "மகாராஷ்டிராவில் சிறிய கட்டடம் கட்டுபவர்கள் பெரிய நகரங்களை உருவாக்க வசதியாக இல்லை" என்று அவர் கூறினார்.

ரியல் எஸ்டேட் திட்டங்களால் நிலம் வைத்திருப்பதற்கான 24 ஏக்கர் வரம்பை நீக்கி, கட்டுமானத்தைத் தொடங்குவதற்கு மூன்று ஆண்டுகளுக்குப் பதிலாக ஐந்து ஆண்டுகளுக்கு நிலம் வைத்திருக்க அனுமதித்த மேற்கு வங்கத்தில் 2014 இல் திருத்தங்கள் நிறைவேற்றப்பட்ட திருத்தம், பெரிய நகரங்கள், மாநில அதிகாரிகள் மற்றும் ரியல் எஸ்டேட் ஆகியவற்றின் வளர்ச்சியை அதிகரிக்கும் நோக்கத்தையும் கொண்டுள்ளதாக, டெவலப்பர்கள் கூறியதாக தெரிவிக்கப்பட்டது.

ஜனவரி 19 முதல் 22 வரை, 11 மாநில அரசுகளின் வருவாய் துறைகளை சேர்ந்த பல அதிகாரிகளுக்கும், நில சீர்திருத்தங்களை கண்காணிக்கும் மத்திய அமைச்சகத்திற்கு மின்னஞ்சல்கள் அனுப்பப்பட்டன. அவர்களிடம் இருந்து பதில் கிடைத்ததும், இக்கட்டுரை புதுப்பிக்கப்படும்.

விவசாய நிலங்களை வாங்குவதற்கும் நில பயன்பாட்டை மாற்றுவதற்கும் தொழில்களை அனுமதிப்பதில் "எந்தத் தீங்கும் இல்லை" என்று திட்டக் கமிஷனின் முன்னாள் செயலாளரும், நில மறுவிநியோகத்தின் குரல் ஆதரவாளருமான என்.சி.சக்ஸேனா, இந்தியாஸ்பெண்டிடம் தெரிவித்தார். விவசாயத்தை விட ஒரு யூனிட் நிலத்திற்கு வேலைவாய்ப்பு தொழில்களுக்கு அதிகமாக இருக்கும் என்று சக்சேனா கூறினார்.

இருப்பினும், தொழில்கள் வரும்போது, ​​அவை வழக்கமாக உள்ளூர் அல்லாதவர்களை வேலைக்கு அமர்த்தும் என்று தலித் மனித உரிமைகளுக்கான தேசிய பிரச்சார இயக்கத்தின் மனோகரன் கூறினார். அவர்கள் உள்ளூர் மக்களை வேலைக்கு அமர்த்தினால், குறைந்த ஊதியம் தரும் கையால் கழிவு அகற்றுவது போன்ற வேலையில் அமர்த்திக் கொள்கிறார்கள், ஏற்கனவே வளைந்திருக்கும் சமூக-பொருளாதார உறவுகளை மேலும் பிளவுபடுத்தும் என்று, மனோகரன் இந்தியாஸ்பெண்டிடம் தெரிவித்தார். "இடம்பெயர்வு வளங்கள் மீது கூடுதல் அழுத்தத்தை உருவாக்குகிறது மற்றும் ஏற்கனவே சாதி சமூக கட்டமைப்பை பலப்படுத்துகிறது," என்று அவர் கூறினார்.