முறைசாரா தொழிலாளர்களுக்கு ஊதியத்தை மீட்டெடுக்க ஹெல்ப்லைன் எப்படி உதவுகிறது

"சில மாதங்களாக எனக்கும் என் மனைவிக்கும் கொடுக்க வேண்டிய ஊதியத்தை திரும்பப் பெற முயற்சித்தேன், ஆனால் ஒப்பந்தக்காரர் சாக்குப்போக்கு கூறி நிலுவையில் உள்ள ஊதியத்தை தாமதப்படுத்தினார். பின்னர் இங்கு தரப்பட்ட ஒரு கார்டில் ஹெல்ப்லைன் எண்ணைக் கண்டேன்" என்று யெல்லப்பா, இந்தியா ஸ்பெண்டிடம் கூறினார். ஜூலை தொடக்கத்தில் தென்மேற்கு பெங்களூருவின் ஹொசகெரேஹள்ளி தொழிலாளர் மையத்தில், நாங்கள் அவரைச் சந்தித்தோம், அங்கு அவர் மற்ற தொழிலாளர்களுடன் ஒப்பந்தக்காரர்களிடம் இருந்து ஒருநாள் வேலையைக் கண்டறிவதற்காக காத்திருந்தார். ஹெல்ப்லைனைத் தொடர்பு கொண்ட பிறகு, யெல்லப்பா இறுதியாக சமரசம் மூலம் ஊதியத்தை திரும்பப்பெற முடிந்தது.

அந்த ஹெல்ப்லைன், இந்தியா லேபர்லைன் ஆகும், இது ஜூலை 2021 இல் ஆஜீவிகா பணியகத்துடன் இணைந்து, உழைக்கும் மக்கள் அதிகாரம் ( Working Peoples' Charter - WPC) என்ற புலம்பெயர்ந்த மற்றும் முறைசாரா தொழிலாளர்களுக்காக அமைக்கப்பட்டது. உழைக்கும் மக்கள் அதிகாரம் (டபிள்யு.பி.சி - WPC) என்பது மும்பையைத் தலைமையிடமாகக் கொண்டு தொழிலாளர் பிரச்சினைகளில் பணிபுரியும் அமைப்புகளின் கூட்டமைப்பாகும். ஆஜீவிகா பணியக அறக்கட்டளையானது, தெற்கு ராஜஸ்தான் மற்றும் நகர்ப்புற குஜராத் மற்றும் மகாராஷ்டிராவில் புலம்பெயர்ந்த தொழிலாளர் நலனுக்காக செயல்படுகிறது.

மார்ச் 2020 இன் பிற்பகுதியில், நாடு தழுவிய கோவிட்-19 பொது முடக்கம் அறிவிக்கப்பட்டவுடன், பல லட்சக்கணக்கான முறைசாரா புலம்பெயர்ந்த தொழிலாளர்களுக்கு முக்கிய வேலைவாய்ப்பு மையங்களான, இந்தியாவின் பெருநகரங்கள் மற்றும் பெரிய நகரங்களில் வேலைத் தளங்கள் திடீரென மூடப்பட்டன. இதனால், தொழிலாளர்கள் வெளியேறினர். சுமார் 11.4 மில்லியன் புலம்பெயர்ந்த தொழிலாளர்கள் - உத்தரகாண்ட் மக்கள்தொகையை விட - வேலைகள், தங்குமிடம், உணவு, போக்குவரத்து அல்லது எந்த ஒழுங்கமைக்கப்பட்ட ஆதரவு அமைப்பும் இல்லாமல் சிக்கித் தவித்து, தங்கள் குடும்பங்கள் மற்றும் உடமைகளுடன் வீடு திரும்பினர். பலர் நடந்தே பயணம் செய்தனர், இதன் விளைவாக, ரயிலில் இறந்த 96 தொழிலாளர்கள் உட்பட குறைந்தது 971 கோவிட் அல்லாத இறப்புகள் ஏற்பட்டன என்று, மார்ச் 2021 இல் இந்தியா ஸ்பெண்ட் கட்டுரைதெரிவித்துள்ளது.

கோவிட்-19 பொதுமுடக்கத்தின் போது புலம்பெயர்ந்த தொழிலாளர்களின் துயரத்திற்கு பதிலளிக்கும் வகையில், இந்தியா லேபர்லைன் என்ற உதவி மையம் அமைக்கப்பட்டது. "ஊரடங்கின்போது தொழிலாளர்கள் அரசுகள் மற்றும் முதலாளிகளால் எவ்வாறு கைவிடப்பட்டனர் என்பதை நாம் பார்த்தோம். பெரும்பாலானவர்கள் தங்கள் பணியிடங்களில் ஒப்பந்தம் அல்லது சமூகப் பாதுகாப்பு இல்லை" என்று, டபிள்யு.பி.சி. தேசிய ஒருங்கிணைப்பாளர் சந்தன் குமார், இந்தியா ஸ்பெண்டிடம் கூறினார்.

தொழிலாளர் குழு, முதன்மையாக ஊதிய தகராறுகளை பதிவு செய்தல் மற்றும் தீர்ப்பதில் கவனம் செலுத்துகிறது, மேலும் ஊதிய இழப்பீடு தாமதங்கள் மற்றும் தொழிலாளர்களின் உரிமை மீறல் வழக்குகளையும் இது கையாண்டது, அத்துடன் தொழிலாளர்களின் உரிமைகள் மற்றும் நலத்திட்டங்கள் பற்றிய தகவல்களையும் வழங்குகிறது.

ஜூன் 2022 வரை, ஹெல்ப்லைன் வாயிலாக ரூ. 8 கோடி ஊதிய தகராறுகள் சம்பந்தப்பட்ட 3,600 க்கும் மேற்பட்ட வழக்குகளை (நலவாரிய உரிமைகள் பற்றிய தகவல்களுக்கான அழைப்புகள் தவிர்த்து) பதிவு செய்துள்ளது. இந்தியா ஸ்பெண்ட் அணுகிய ஹெல்ப்லைன் தரவுகளின்படி, இழப்பீடு மற்றும் ஊதியத் திருட்டு வழக்குகளைத் தீர்ப்பதில் மொத்தம் ரூ. 2.1 கோடி மீட்கப்பட்டது.

இந்தியா லேபர்லைன் மாதிரி பயனுள்ளது மற்றும் மத்திய மற்றும் மாநில அரசுகளின் ஆதரவுடன் அளவிட முடியும், ஏனெனில் தேவையான முதலீடு உதவி முயற்சிகள் அல்லது கார்ப்பரேட் சமூகப் பொறுப்பு (CSR) நிதிகள் மூலம் நிதியளிக்கப்படும் என்று, தொழிலாளர் மற்றும் இடம்பெயர்வு நிபுணர்கள், இந்தியா ஸ்பெண்டிடம் இடம் கூறினார்.

தொழிலாளர் நிர்வாகத்தை ஆதரிப்பதும், இந்த மாதிரியை நாட்டின் பல்வேறு பகுதிகளுக்கும் விரிவுபடுத்துவதும் யோசனையாகும் என்று, இந்தியா லேபர்லைன் இயக்குனர் சுஷோவன் தார், இந்தியா ஸ்பெண்டிடம் கூறினார். "நாங்கள், மாநில வழிமுறைகளுக்கு மாற்றாக உருவாக்கவில்லை, ஆனால் தொழிலாளர் நிர்வாகத்தில் உள்ள இடைவெளிகளை சரிசெய்வது பற்றி அரசுக்கு தெரிவிக்க முயற்சிக்கிறோம். தொழிலாளர் ஹெல்ப்லைன் மட்டும் எல்லா பிரச்சனைகளையும் சரி செய்யாது" என்று தர் கூறினார்.

நகரங்களில் உள்ள தொழிலாளர் மையங்களில் ஹெல்ப்லைனை பிரபலப்படுத்துதல்

ஜூன் 2021 இல், பொதுமுடக்கம் பிறப்பிக்கப்பட்டதால் வெளியேற்றப்பட்ட புலம்பெயர்ந்தோர் நலன் குறித்த மனுவுக்கு பதிலளிக்கும் போது, ​​அமைப்புசாராத் துறை ஊழியர்களின் அரசாங்கப் பதிவானது விரைவுபடுத்தப்பட வேண்டும் என்று உச்ச நீதிமன்றம் உத்தரவிட்டது. இந்தியாவில், 90%க்கும் அதிகமான தொழிலாளர்கள் முறைசாரா துறையில் பணிபுரிகின்றனர். ஆகஸ்ட் 2021 இல் அரசு தனது இ-ஷ்ரம் போர்ட்டலில், 380 மில்லியன் அமைப்புசாரா துறை தொழிலாளர்களை பதிவு செய்யத் தொடங்கியது. ஆகஸ்ட் 2, 2022 நிலவரப்படி, சுமார் 280 மில்லியன் (74%) தொழிலாளர்கள் பதிவு செய்யப்பட்டுள்ளனர். இவர்களில், 70% க்கும் அதிகமானோர் விவசாயம், வீட்டு வேலையாட்கள் அல்லது கட்டுமானத் தொழிலில், தினமும் ஹோசகெரேஹள்ளி தொழிலாளர் மையத்தில் கூடும் தொழிலாளர்களைப் போல வேலை செய்கிறார்கள்.

மழைக்காலத் தூறல் காரணமாக, ஜூலை தொடக்கத்தில், ஹோசகேரஹள்ளி தொழிலாளர் மையத்திற்கு வழக்கத்தை விட குறைவான தொழிலாளர்கள் வந்திருந்தனர், நாங்கள் இந்தியா லேபர்லைன் குழுவுடன் அவர்களின் அவுட்ரீச் வேலையில் இருந்தோம். வழக்கமாக, யெல்லப்பா போன்ற சுமார் 500 தொழிலாளர்கள் பரபரப்பான பிரதான சாலையின் இருபுறமும் வேலைவாய்ப்பினை எதிர்பார்த்து காத்திருந்தனர்; ஒரு சாத்தியமான வேலை தரக்கூடிய முதலாளி வரும்போது, ​​விரைவாக அவர்களிடம் ஊதியத்தை பற்றி பேச்சுவார்த்தை நடத்தினார்கள் என்று, குழு எங்களுக்குத் தகவல் கொடுத்தது. பெண் தொழிலாளர்களை விட ஆண் தொழிலாளர்கள் தங்கள் திறமையின் அடிப்படையில் ஒரு நாளைக்கு ரூ.600 முதல் ரூ.1,200 வரை சம்பாதிக்கும் அதே வேளையில், பெண்கள் மிகக் குறைவாகவே, சுமார் ரூ.500க்கு சம்பாதிக்கிறார்கள்.

ஜூலை 6, 2022 அன்று ஹோசகெரேஹள்ளியில், இந்தியா லேபர்லைன் ஊழியர்கள், தொழிலாளர்களுக்கு அட்டை மற்றும் துண்டுப் பிரசுரங்களை விநியோகித்தனர்.

மாநில ஒருங்கிணைப்பாளர் முனிராஜு டி., தொலைத்தொடர்பு ஆலோசகர் பிரான்சிஸ் குணவந்தே, கள நடமாட்ட குழுவினரான காயத்திரி ரகு குமார் மற்றும் ஸ்ரீகாந்த் ஆகியோர், ஹெல்ப்லைன் தகவல் அடங்கிய துண்டுப் பிரசுரங்கள் மற்றும் அட்டைகளை வழங்கத் தொடங்கியதும், ஆர்வமுள்ள தொழிலாளர்கள் கூட்டம் மெதுவாக அவர்களை நோக்கி திரண்டது. சிலர் வேலை தேடும் முயற்சியில் தீவிரமாக அணுகினர், அதே சமயம் இதை பார்த்த மற்றவர்கள் எப்படி 'லேபர் கார்டுகளை' பெறுவது என்பதைப் புரிந்து கொள்ள விரும்பினர் [எ.கா., கர்நாடகா கட்டிடம் மற்றும் பிற கட்டுமானத் தொழிலாளர் நல வாரியத்தின் பலன்கள் அட்டை] விலைவாசி அதிகம் உள்ள பெருநகரில், பிற தொழிலாளர் உரிமைகளை உருவாக்கி அணுக, இது உதவும். சிலர் ஹெல்ப்லைனின் செயல்பாடுகளை தங்கள் சக ஊழியர்களுக்கு விளக்க முயன்றனர்.

காயத்ரி, A4 அளவிலான படிவத்துடன் தொழிலாளர்கள் கூட்டத்தில் பேசியபோது, ஹெல்ப்லைனைத் தொடர்பு கொள்வதன் மூலம் உறுதி அளிக்கப்பட்ட அதே நேரம் செய்து தராத நீண்டகால புகார்களுக்கு தீர்வையும் வாய்ப்பு பற்றியும் ஒரு சிலர் கேட்டனர்.

பெங்களூருவில் உள்ள கர்நாடக இந்தியா லேபர்லைன் குழுவினர், ஜூலை 5, 2022 அன்று எடுத்துக் கொண்ட புகைப்படம் இது. ஜூலை 2021 இல் ஹெல்ப்லைன் தொடங்கப்பட்டதில் இருந்து 1,000 க்கும் மேற்பட்ட வழக்குகள் பதிவு செய்யப்பட்டுள்ளன.

கிழக்கு-மத்திய கர்நாடகாவில் உள்ள பல்லாரி மாவட்டத்தைச் சேர்ந்த கருப்புத் தொப்பி மற்றும் வெள்ளைச் சட்டை அணிந்த கொத்தனார் ராஜேஷ், வழக்கின் அடிப்படை விவரங்களை குறிப்பிட்டு, காயத்ரியிடம் தனது அவலநிலையைப் பகிர்ந்து கொண்டார். ஆரம்பப் பள்ளியை முடிக்காத, மன உளைச்சலுக்கு ஆளான தொழிலாளிக்கு 2020 இல் பொதுமுடக்கத்தில் இருந்து அவருக்குச் சம்பளம் இருந்தது. "அந்த நபர் எனக்கு ரூ. 8,000 கடன்பட்டுள்ளார். அவருடைய எண் என்னிடம் இல்லை, ஆனால் என்னால் வீட்டை அடையாளம் காண முடியும்" என்று ராஜேஷ் கூறினார். அவர் கஷ்டப்பட்டு சம்பாதித்த ஊதியத்தை மீட்டெடுப்பதற்கான நம்பிக்கை இருப்பதைக் கற்றுக் கொண்டதில், ஆஸ்வாசமடைந்தார்.

கர்நாடகா இந்தியா லேபர்லைன் குழு, ஜூன் 2022 இல் இருந்து ஒன்பது மாதங்களில் 1,000 க்கும் மேற்பட்ட வழக்குகளை பதிவு செய்துள்ளது, இது அனைத்து மாநிலங்களிலும் அதிகம். இந்த வழக்குகள் பெரும்பாலும் நகரத்தில் உள்ள புலம்பெயர்ந்த தொழிலாளர்களின் அழைப்புகள் மூலம் வெளிச்சத்திற்கு வந்தன. இது 319 வழக்குகளை முழுமையாகத் தீர்த்து, 49 வழக்குகளை ஓரளவு தீர்த்து, 2022 ஜூன் நடுப்பகுதி வரை இந்தியா லேபர்லைன் மூலம் கிட்டத்தட்ட ரூ. 70 லட்சம் தொகையை அல்லது மூன்றில் ஒரு பங்கை மீட்டெடுத்துள்ளது.

திறம்பட, அரசு அலுவலகங்களை அமைத்து ஆட்களை வேலைக்கு அமர்த்திய பிறகு 2021 அக்டோபரில் லேபர்லைன் செயல்படத் தொடங்கியது என்று தார் கூறினார். "ஆறு மாதங்களில் ரூ. 1 கோடியையும் மீதியை [~ரூ. 1.1 கோடி] 3 மாதங்களில் மீட்டெடுக்க முடிந்தது" என்றார்.

இந்தியா லேபர்லைன் என்பது, தொலைபேசி அடிப்படையிலானது என்றாலும், பல தொழிலாளர்கள், இந்தியா லேபர்லைன் வசதி மையங்களைக் கொண்ட மாநிலங்களில், அவுட்ரீச்சின் போது ஊழியர்களுடன் நேரடியாக தொடர்பு கொள்ளும்போது, ​​பிரச்சனைகளைப் பகிர்ந்து கொள்கின்றனர் என்று குழு தெரிவித்துள்ளது. பெங்களூரு தவிர, இந்தியா லேபர்லைன் டெல்லி, மும்பை, ஹைதராபாத் மற்றும் லக்னோவில் மாநில வசதி மையங்களைக் கொண்டுள்ளது.

ஹெல்ப்லைன், இந்தியாவில் எந்த இடத்தில் இருந்தும் தொழிலாளர்களால் எளிதாக அணுகக்கூடியது, ஆனால் சாதாரண அழைப்புகள் பெரும்பாலும் வேலைவாய்ப்பு மையங்களான நகரங்களில் உள்ள தொழிலாளர்களிடமிருந்து வரும். மும்பையில் அமைந்துள்ள முக்கிய அழைப்பு மையம், காலை 8 மணி முதல் மாலை 6 மணி வரை இயங்கும். இந்தி, மராத்தி, கன்னடம் மற்றும் தெலுங்கு ஆகிய மொழிகள் பேசும் ஏழு ஆலோசகர்கள், தொழிலாளர்களின் அழைப்புகளுக்குப் பதிலளிக்கின்றனர். உள்ளூர் அமைப்புகளின் ஆதரவுடன் நகரங்களில் தொழிலாளர் அமைப்பு செயல்படுத்தப்படுகிறது. கர்நாடகாவில், கிராமீனா கூலிகார்மிகரா சங்கதனே (அதாவது 'கிராமப்புற உடலுழைப்புத் தொழிலாளர்கள் சங்கம்' அல்லது GRAKOOS) ஆதரவுடன் இது செயல்படுத்தப்படுகிறது.

"எங்கள் அடிப்படை அணுகுமுறை தொழிலாளர்கள் மத்தியில் ஹெல்ப்லைனை பிரபலப்படுத்துவதும், ஏதேனும் உரிமை மீறல்களுக்கு லேபர்லைனை அழைக்க அவர்களை ஊக்குவிப்பதும் ஆகும்" என்று, ஆஜீவிகா பணியகத்தின் கொள்கை மற்றும் கூட்டாண்மை திட்ட மேலாளர் திவ்யா வர்மா, பெங்களூரில் உள்ள மாநில மையத்தில் கூறினார்.

சமூக பாதுகாப்பு குறியீடு - 2020, பதிவு மற்றும் ஆதரவுடன் அமைப்புசாரா, பெருவணிக மற்றும் நடைபாதை தொழிலாளர்களுக்கு உதவ ஹெல்ப்லைன்கள் அல்லது வசதி மையங்களை உருவாக்க வேண்டியதன் அவசியத்தை குறிப்பிடுகிறது. நாடு தழுவிய கோவிட்-19 பொது முடக்கத்தின் போது, ​​மத்திய தொழிலாளர் மற்றும் வேலைவாய்ப்பு அமைச்சகம், ஏப்ரல் 2020 இல் தொழிலாளர்களுக்கான ஹெல்ப்லைனைத் தொடங்கியது. எவ்வாறாயினும், தொற்றுநோய்க்கு முந்தைய தொழிலாளர் நிர்வாகத்தின் நெருக்கடியைக் கையாள்வதில் இது பயனற்றது, சிக்கித் தவிக்கும் புலம்பெயர்ந்த தொழிலாளர்களுக்கான நிவாரணத்தைத் திரட்டுவதற்காக மார்ச் 2020 இல் ஒன்றிணைந்த, நாடு கடந்த தன்னார்வக் குழுவான Stranded Workers Action Network இன் ஜூன் 2021 அறிக்கை கூறியது.

"தொழிலாளர் அமைச்சகத்தின் ஹெல்ப்லைன்கள், உதவி மையங்கள் அல்ல, ஆனால் சிறந்த தபால் அலுவலகங்கள்" என்று அறிக்கை கூறியது. இது இந்தியா லேபர்லைன் ஊழியர்களால் எதிரொலிக்கப்பட்டது, ஹெல்ப்லைன் என்பது கோவிட் தொடர்பான நிவாரணத்திற்காக மட்டுமே தற்காலிகமானது என்றும், இந்தியா லேபர்லைன் மாதிரியைப் போன்று மத்திய அரசின் தொழிலாளர் ஆதரவு உதவி எண் எதுவும் இல்லை என்றும் எங்களிடம் கூறினார்.

இந்தியா ஸ்பெண்ட், தொழிலாளர் மற்றும் வேலைவாய்ப்பு அமைச்சகத்தின் மூத்த அதிகாரிகளிடம், குறியீட்டில் குறிப்பிட்டுள்ளபடி தொழிலாளர் ஹெல்ப்லைனை உருவாக்கும் திட்டங்களையும், இந்தியா லேபர்லைனைப் போன்ற ஒரு மாதிரியை ஏற்றுக்கொள்வதையும் கருத்தில் கொள்ளுமா என்று கேட்டுள்ளது. அவர்களிடம் இருந்து பதிலைப் பெறும்போது, இக்கட்டுரையைப் புதுப்பிப்போம்.

புலம்பெயர்ந்தோர்/முறைசாரா தொழிலாளர்களுக்கு ஆதரவாக ஹெல்ப்லைன் எவ்வாறு செயல்படுகிறது

"பெரும்பாலான தொழிலாளர்கள் ஊதிய திருட்டு அல்லது பணம் செலுத்துவதில் தாமதம் பற்றி புகார் கூறுகின்றனர். பணியாளர் வருங்கால வைப்பு நிதி மற்றும் பணியாளர்கள் மாநில காப்பீடு [ஒழுங்கமைக்கப்பட்ட துறை ஊழியர்களுக்கான] தொடர்பான சில சர்ச்சைகள் மற்றும் காயத்திற்கான இழப்பீடு தொடர்பான சில அழைப்புகள் இருந்தாலும், பெரும்பாலான வழக்குகள் கட்டுமானத் துறையில் ஊதிய தகராறுகள்," என்று, தினமும் கிட்டத்தட்ட 25 அழைப்புகளை மேற்கொள்ளும் கன்னட டெலி-ஆலோசகர்களில் ஒருவரான குணவந்தே கூறினார்.

ஒரு வழக்கு பதிவு செய்யப்பட்டவுடன், எடுத்துக்காட்டாக, ஊதிய தகராறு பற்றி எனில், ஆலோசகர்கள் இது தொடர்பாக ஒப்பந்தக்காரர் அல்லது முதலாளிக்கு டெலிமெடியேட் செய்ய அழைப்பு விடுக்கின்றனர். அவர்களில் சிலர் பணம் செலுத்த ஒப்புக் கொள்கிறார்கள், மற்றவர்கள் இல்லை. பல முயற்சிகளுக்குப் பிறகு டெலிமீடியேஷன் முயற்சிகள் தோல்வியுற்றால், அது முதலாளியுடன் மத்தியஸ்தம் செய்ய கள விஜயம் செய்யும், அத்துடன் மாநிலக் குழுவுக்குத் தெரிவிக்கப்படும். விளைவுகள் மற்றும் சாத்தியமான சட்ட விரிவாக்கம் பற்றி அவர்கள் முதலாளிகளுக்கு தெரிவிக்கின்றனர்.

"அழைப்புகள் வேலை செய்யவில்லை என்றால், நாங்கள் அவர்களை [முதலாளிகளை] அவர்களின் அலுவலகத்திலோ அல்லது பணியிடத்திலோ சந்திக்க முயற்சிக்கிறோம். மத்தியஸ்தத்திற்காக ஒப்பந்ததாரர்களின் வீடுகளுக்குச் செல்ல வேண்டாம் என்று நாங்கள் விரும்புகிறோம். கடைசி முயற்சியாக, [வழக்கறிஞர்கள் மூலம்] ஒரு சட்ட நோட்டீஸ் அனுப்ப நாங்கள் தீவிரப்படுத்துகிறோம்," என்று, GRAKOOS இன் ஒரு பகுதியாக இருக்கும் மற்றும் கள மத்தியஸ்தத்தில் ஈடுபட்டுள்ள கர்நாடக மாநில ஒருங்கிணைப்பாளர் முனிராஜு, இந்தியா ஸ்பெண்டிடம் கூறினார்.

தொழிலாளர்களிடம் நம்பிக்கையை வளர்க்க, அவர்களுடன் தொடர்பு கொள்ள வேண்டியதன் அவசியத்தை அவர் வலியுறுத்தினார். "நாங்கள் 100 கார்டுகளைப் பகிர்ந்து கொண்டால், எட்டு வழக்குகள் வரை கிடைக்கும் என்று நான் மதிப்பிட்டுள்ளேன். தொழிலாளர்கள் எங்களை நம்பத் தொடங்கும் போது மட்டுமே பதிலளிப்பார்கள், நாங்கள் அவர்களைச் சந்தித்தால் மட்டுமே அது நடக்கும்" என்றார். அவர்கள் அன்றைய தினம் வேலைக்குச் செல்வதற்கு முன்பு, காலை 10 மணிக்கு முன் அவர்களின் வழக்குகள் குறித்து, குழு அவர்களுடன் பின்தொடர்வதாக அவர் மேலும் கூறினார்.

தற்போது, ​​இந்திய லேபர்லைன் தரவுகளின்படி, இந்தியா லேபர்லைன் ஆண்டுக்கு ரூ.2 கோடிக்கும் அதிகமாக மதிப்பிலான தொகைக்கு தீர்வு ஏற்படுத்துவதாக மதிப்பிடப்பட்டுள்ளது. அக்டோபர் 2022 க்குள், ஹெல்ப்லைன் 11 கூடுதல் நகரங்களுக்கு விரிவடையும் என்று எதிர்பார்க்கப்படுகிறது, இது பெரும்பாலும் தெற்கு மற்றும் மேற்கு நகர்ப்புற வேலை இடங்களை உள்ளடக்கியது என்று தர் கூறினார். இது ராஜஸ்தானில் ஆஜீவிகா பணியகத்தால் நிறுவப்பட்ட தசாப்த கால தொழிலாளர் ஹெல்ப்லைனை அடிப்படையாகக் கொண்டது என்று இரு அமைப்புகளின் குழுக்களும் எங்களிடம் தெரிவித்தனர்.

ராஜஸ்தானின் வெற்றிகரமான தொழிலாளர் உதவி எண்

லேபர் லைனாது, ராஜஸ்தான் அரசாங்கத்துடன் இணைந்து, ஆஜீவிகா பணியகத்தால் நடத்தப்படும் இதேபோன்ற தொலைபேசி அடிப்படையிலான ஹெல்ப்லைனை அடிப்படையாகக் கொண்டது.

உத்தரப்பிரதேசத்தைச் சேர்ந்த வெல்டரான அமித்குமார் குப்தா, 32, அக்டோபர் 2021 இல் மும்பையில் ஒரு ஒப்பந்தக்காரருடன் வேலை செய்யத் தொடங்கியபோது, ​​அவருக்கு மாத ஊதியமாக ரூ.18,000 தருவதாக வாக்குறுதி அளிக்கப்பட்டது. பிப்ரவரி 2022 இல், அவர் வேலைக்காக இந்தூருக்கு அனுப்பப்பட்டார். பிப்ரவரி மற்றும் ஏப்ரல் மாதங்களுக்கு இடையில் அவருக்கு ஊதியம் வழங்கப்படவில்லை என்று அவர் கூறினார். மார்ச் மாதத்தில் வசந்த விழாவான ஹோலி வந்ததாலும், ஏப்ரலில் குடும்பத்தில் ஒரு திருமணம் நடக்கவிருந்ததாலும், அவர் மன உளைச்சலுக்கு ஆளானார். குப்தா கிட்டத்தட்ட 15 ஆண்டுகளாக செய்து வரும் வேலையில் இதுபோன்ற சூழ்நிலைகளை சந்தித்ததில்லை என்று அவர், இந்தியா ஸ்பெண்டிடம் கூறினார்.

அவர் இணையத்தில் கிடைத்த லேண்ட்லைன் எண்ணுக்கு அழைத்தார், இது ராஜஸ்தானில் ஆஜீவிகா பணியகம் அமைத்த லேபர்லைன் மூலம் பெறப்பட்டது, இது அவருக்கு உரிய ஊதியத்தைப் பெற உதவியது. "அழைப்பு எந்த மாநிலத்துடன் இணைக்கப்பட்டது என்று எனக்குத் தெரியவில்லை, ஆனால் என்னைப் போன்ற தொழிலாளர்களுக்கு இது மிகவும் பயனுள்ளதாக இருக்கும்" என்கிறார் குப்தா. "இப்போது நான் இதுபோன்ற பிரச்சனைகளை எதிர்கொண்டால் ஆதரவை அணுக முடியும் என்பதை அறிந்து பயமின்றி எங்கும் வேலைக்குச் செல்ல முடியும்" என்ற குப்தா, தன்னுடன் முழு ஊதியம் பெறாத மற்ற தொழிலாளர்கள் இருப்பதாகவும், அதே ஒப்பந்தக்காரரிடம் இருந்து ஆஜீவிகாவின் தொழிலாளர் நிறுவனத்தில் புகார் பதிவு செய்யலாமா என்று முடிவு செய்வதற்கு முன் காத்திருப்பதாகவும் கூறினார்.

2009-10 ஆம் ஆண்டில், ஆஜீவிகா பணியகம், உதய்பூர் மற்றும் தெற்கு ராஜஸ்தானின் அருகிலுள்ள பகுதிகளில் புலம்பெயர்ந்த/முறைசாரா தொழிலாளர்களுக்கு ஒரு ஆஃப்லைன் ஆதரவு அமைப்பை அமைத்தது.

புலம்பெயர்ந்த தொழிலாளர்கள் தங்கள் பணியிடத்தில் தங்கி வழக்குகளில் நுழைய முடியாததால், முதலாளிகளிடமிருந்து இழப்பீடு பெறுவதற்கு மத்தியஸ்தம் ஒரு பொருத்தமான வழிமுறையாகும் என்று ஆஜீவிகா பணியகத்தின் திட்ட மேலாளர் (சட்டக் கல்வி, உதவி மற்றும் வழக்கறிஞர்) சந்தோஷ் பூனியா, இந்தியா ஸ்பெண்டிடம் தெரிவித்தார். தொழிலாளர்களிடம் இருந்து பெறும் பிரச்சனைகள் உதய்பூர் பகுதியில் மட்டும் இல்லை என்பதை உணர்ந்த ஆஜீவிகா, 2013 இல் தொலைபேசி அடிப்படையிலான ஹெல்ப்லைனை அமைத்தார்.

தொலைபேசி அடிப்படையிலான அமைப்பு மூலம் மத்தியஸ்தம் செய்வது நேரம் மற்றும் பணத்தின் அடிப்படையில் இரு தரப்பினருக்கும் நன்மை பயக்கும் என்று பூனியா கூறினார். "ஒரு வழக்கு உண்மையானது மற்றும் மூன்றாம் தரப்பினர் மத்தியஸ்தம் செய்தால், வழக்குகளில் ஈடுபடுவது அவர்களுக்கு உதவாது என்பது முதலாளிகளுக்குத் தெரியும். வழக்குதான் எங்களின் கடைசி முயற்சி," என்று அவர் கூறினார்.

இது அமைக்கப்பட்ட உடனேயே, உதய்பூர் லேபர்லைன் ஹெல்ப்லைன் மூலம் 50 வழக்குகளையும், ஒவ்வொரு மாதமும் சுமார் 30 ஆஃப்லைன் வழக்குகளையும் பெறத் தொடங்கியது. "கிட்டத்தட்ட 40%-50% வழக்குகள் தீர்க்கப்படுகின்றன. [2015 இல்], நாங்கள் மாநில அரசாங்கத்தை [ஆதரவு மற்றும் விரிவாக்கத்திற்காக] அணுகினோம், டிசம்பர் 2015 முதல் அதை [அரசாங்கத்தின் சர்ச்சை தீர்க்கும் மையம் மூலம்] நடத்தி வருகிறோம்" என்று பூனியா கூறினார்.

கடந்த 2015 முதல், ஜூன் 2022 வரை, ராஜஸ்தான் ஹெல்ப்லைன் ரூ. 33.5 கோடியை மீட்டுள்ளது மற்றும் அது பதிவு செய்த 18,177 வழக்குகளில் 60% தீர்க்கப்பட்டுள்ளது என்று ஆஜீவிகா தரவு தெரிவிக்கிறது.

"இது தொழிலாளர்களுக்கு உதவுகிறது, மேலும் எங்கள் பணியும் எளிதாகிறது, ஏனெனில் பல சிக்கல்கள் ஹெல்ப்லைன் மூலம் மத்தியஸ்தம் செய்யப்பட்டு தீர்க்கப்படுகின்றன" என்று, ராஜஸ்தான் தொழிலாளர் நல அதிகாரி கஜராஜ் ரத்தோர் தெரிவித்தார். கட்டணமில்லா எண் தொழிலாளர்களுக்கு ஊதியம் வழங்கப்படாத புகார்களை எழுப்ப உதவுகிறது மற்றும் சில வழக்குகள் தொழிலாளர் துறைக்கு அனுப்பப்படுகின்றன, என்றார்.

ஆஜீவிகா பணியகத்தின் ஹெல்ப்லைனுக்கு, 2020 மற்றும் 2021 ஆம் ஆண்டுகளில் 27,000 அழைப்புகள் வந்துள்ளன - 2015 முதல் அனைத்து அழைப்புகளில் 40% க்கும் அதிகமானவை - தொற்றுநோய் தொடர்பான பொதுமுடக்கம் மற்றும் பயணக் கட்டுப்பாடுகள், முறைசாரா தொழிலாளர்களைப் பாதிக்கிறது. எவ்வாறாயினும், தீர்க்கப்பட்ட வழக்குகளின் விகிதம் தொற்றுநோய்களின் போது குறைந்துவிட்டது என்று பூனியா கூறினார், ஏனெனில் முதலாளிகள், நிதி சிக்கல்களை எதிர்கொள்கின்றனர், நிலுவையில் உள்ள ஊதியங்களைத் தீர்க்க கூடுதல் அவகாசம் கேட்கிறார்கள்.

ஆஜீவிகா ஹெல்ப்லைன் இயங்குவதற்கு ஆண்டுக்கு சுமார் ரூ. 60 லட்சம் செலவாகும் என்றாலும், "மாதம் சுமார் ரூ. 40 முதல் ரூ. 50 லட்சம் வரை [சர்ச்சைக்குரிய ஊதியத்தில்] மீட்டெடுக்கிறது, மேலும் உரிமைகள் தொடர்பான தகவல்களையும் விழிப்புணர்வையும் வழங்க முடியும்" என்று பூனியா கூறினார்.

PHIA அறக்கட்டளை, ஒரு அரசு சாரா அமைப்பு (NGO), 2016 ஆம் ஆண்டு முதல் ஜார்க்கண்டில் மாநில அரசுடன் இணைந்து, முறைசாரா தொழிலாளர்கள் தொழிலாளர் நலத் திட்டங்களை அணுக உதவுவதற்காக, இதேபோன்ற கட்டணமில்லா ஹெல்ப்லைனை நடத்தி வருகிறது. 2020 ஆம் ஆண்டில் நாடு தழுவிய கோவிட்-19 லாக்டவுனுக்குப் பிறகு, ஜார்க்கண்ட் அரசாங்கம், சிக்கித் தவிக்கும் புலம்பெயர்ந்த தொழிலாளர்களுக்கு உதவி மற்றும் நிவாரணத்தை வழங்குவதற்கு வசதியாக மாநில புலம்பெயர்ந்தோர் கட்டுப்பாட்டு அறை ஹெல்ப்லைனைத் தொடங்கியது, இது அறக்கட்டளையால் நிர்வகிக்கப்பட்டது. இந்த தலையீடு புலம்பெயர்ந்த தொழிலாளர்களின் தரவுத்தளத்தை உருவாக்க உதவியது, தொழிலாளர்களின் திறன்களை வரைபடமாக்கியது மற்றும் PHIA அறக்கட்டளை பகிர்ந்துள்ள தகவல்களின்படி, நலவாரிய நடவடிக்கைகள் குறித்த விழிப்புணர்வை வழங்கியது. நிலுவையில் உள்ள ஊதியம் மற்றும் விபத்துகளின் போது இழப்பீடு போன்றவற்றை இந்த தொழிலாளர்களுக்கு வழங்குவதற்கு கோவிட்க்குப் பிறகும் ஹெல்ப்லைன் தொடர்கிறது என்று, இங்கிலாந்தில் உள்ள சுயாதீன ஆராய்ச்சி அமைப்பான, இன்டர்நேஷனல் இன்ஸ்டிடியூட் ஃபார் என்விரோன்மென்ட் அண்ட் டெவலப்மென்ட் (IIED) ஜூன் 2022 இன் பகுப்பாய்வு கூறுகிறது. ஜார்கண்ட் ஹெல்ப்லைன் என்பது இந்தியா முழுவதும் விரிவுபடுத்தக்கூடிய மற்றொரு மாடல் என்று, IIED பகுப்பாய்வு குறிப்பிட்டது.

ஆண் தொழிலாளர்கள் பெரும்பாலான வழக்குகளை பதிவு செய்கிறார்கள்

இந்தியா லேபர்லைன் மற்றும் அஜீவிகா ஹெல்ப்லைன் ஆகிய இரண்டிலும் பெரும்பாலான புகார்கள் ஆண் தொழிலாளர்களால் செய்யப்படுகின்றன.

பெண் தொழிலாளர்கள் தங்கள் பிரச்சினைகளை தங்கள் கணவர் அல்லது ஆண் உறவினர்களிடம் தெரிவிக்க முனைகின்றனர் என்று இந்தியா லேபர்லைன் ஊழியர்கள் தெரிவித்தனர். மற்றொரு சவால் என்னவென்றால், பெண் தொழிலாளர்களுக்கு மொபைல் போனோ அல்லது அணுகல் வசதியோ கிடைக்காமல் போகலாம், இதனால் அவர்கள் வழக்குப் பதிவு செய்வதோ அல்லது அதைப் பின்தொடர்வதோ கடினமாகிறது.

பெங்களூருவில் இருந்து கிழக்கே 200 கிமீ தொலைவில் உள்ள வட தமிழ்நாட்டின் திருவண்ணாமலை மாவட்டத்தின் கிராமப்புறத்தைச் சேர்ந்த பர்வதம்மா* என்பவரின் விஷயத்தை எடுத்துக் கொள்ளுங்கள். பர்வதம்மாவுக்கு வயது தெரியவில்லை என்றாலும், பெங்களூரில் பெண்களுக்கான தினசரி ஊதியம் (இப்போது கிட்டத்தட்ட 500 ரூபாய்) 10 ரூபாயாக இருந்த நாட்களில் இருந்து தான் வேலை செய்து வருவதாக எங்களிடம் கூறினார். மற்றொரு பெண் தொழிலாளியுடன் சேர்ந்து, ஒப்பந்ததாரரிடம் 30 நாட்கள் வேலை செய்ததாகவும், ஆனால் பாதி ஊதியமே கிடைத்ததாகவும் அவர் கூறினார். எவ்வாறாயினும், அவரால் ஒப்பந்ததாரரின் எண்ணை மீட்டெடுக்க முடியவில்லை மற்றும் தன்னிடம் மொபைல் போன் இல்லை என்று அவர், இந்தியா லேபர்லைன் குழுவிடம் ஹோசகெரேஹள்ளி தொழிலாளர் மையத்தில் பணிபுரியும் போது கூறினார்.

ஊதியம் மற்றும் அரசாங்க திட்டங்களை அணுகுவதற்கான தொழிலாளர்களின் ஹெல்ப்லைனுக்கான இந்தியா லேபர்லைன் குறித்த துண்டுப்பிரசுரம்.

கிராமப்புறப் பெண்கள் மற்றும் பள்ளிப்படிப்பு இல்லாத பெண்கள், மற்ற பெண்களை விட அவர்கள் தாங்களாகவே பயன்படுத்தும் மொபைல் ஃபோனை வைத்திருப்பது குறைவு, மேலும் அவர்கள் மொபைல் போன் வைத்திருந்தால் குறுஞ்செய்திகளைப் படிக்கும் திறன் குறைவு என்று தேசிய குடும்ப நல ஆய்வு-5 கூறுகிறது.

பெண்களால் புகார் அளிக்கப்படும் வழக்குகள் பணித்துறையையும் சார்ந்து இருக்கும் என்று, இந்தியா லேபர்லைன் குழு தெரிவித்துள்ளது. உதாரணமாக, ஆண் தொழிலாளர்கள் ஆதிக்கம் செலுத்தும் கட்டுமானத் துறையை விட, ஆடைத்துறை நகரங்களில் அதிக வழக்குகள் பதிவு செய்யப்படுகின்றன, தொழிலாளர்கள் பெரும்பாலும் பெண்களாக உள்ளனர்.

அரசு ஆதரவு தொழிலாளர் உதவி எண்களை அதிகரிக்க உதவும்

இந்தியா லேபர்லைன் மற்றும் ஆஜீவிகா போன்ற ஹெல்ப்லைன்கள் இந்தியாவின் மில்லியன் கணக்கான பயணத் தொழிலாளர்களுக்கு பயனுள்ளதாக இருக்கும் என்று தொழிலாளர் மற்றும் இடம்பெயர்வு நல நிபுணர்கள் மற்றும் அறிஞர்கள் கருதுகின்றனர்.

மத்தியஸ்த ஹெல்ப்லைன் பொதுவாக முறையான தொழிலாளர்களுடன் தொடர்புடையது மற்றும் முறைசாரா தொழிலாளர்கள் மற்றும் அரசு அதிகாரிகள் உட்பட அனைத்து பங்குதாரர்களுக்கும் ஆதரவளிக்க முடிந்தால் பயனுள்ளதாக இருக்கும் என்று, தொழிலாளர் பொருளாதார நிபுணர் மற்றும் ஜாம்ஷெட்பூரில் உள்ள சேவியர் ஸ்கூல் ஆஃப் மேனேஜ்மென்ட்டில் வருகை பேராசிரியர் கே.ஆர். ஷியாம் சுந்தர் தெரிவித்தார். "பல அதிகாரத்துவ சுவர்களுக்குப் பின்னால் மறைந்திருக்கும் தொழிலாளர் துறை அதிகாரிக்கு, இது எளிதான அணுகலை வழங்குகிறது, ஆனால் தொழிலாளர் துறை அதிகாரிகளுக்கு இந்த முறையை கையாள போதுமான பொறுமையும் நேரமும் உள்ளதா என்பதுதான் கேள்வி.

அரசு அதிகாரிக்கும் தொழிலாளிக்கும் இடையே இடைநிலைப்படுத்தும் செயல்பாடு நேரடித் தகவல் தொடர்பு அமைப்பால் மாற்றப்படுவதாக உணர்ந்தாலும், தொழிற்சங்கங்கள், இத்தகைய ஹெல்ப்லைன் அமைப்பை தீவிரமாக ஆதரிக்க வேண்டும் என்று சுந்தர் உணர்ந்தார்.

ஹெல்ப்லைன்கள் பயனுள்ளதாக இருக்கும் மற்றும் புலம்பெயர்ந்த தொழிலாளர்கள் ஆவணங்கள் மற்றும் உரிமைகளை அணுக அனுமதிக்கும் அதே வேளையில், அரசின் பங்கேற்பு சிவில் சமூக அமைப்புகள் மற்றும் தன்னார்வ தொண்டு நிறுவனங்களை மேம்படுத்தும் என்று, மும்பையில் உள்ள சர்வதேச மக்கள்தொகை ஆய்வு நிறுவனத்தில் இடம்பெயர்வு மற்றும் நகர்ப்புற ஆய்வுகள் துறை தலைவர் ராம் பாபு பகத் கூறினார். இது, தொழிலாளர் நலனில் பணிபுரியும் நிறுவனங்களுக்கு புலம்பெயர்ந்த தொழிலாளர்கள் போன்ற பாதிக்கப்படக்கூடிய குழுக்களுக்கு ஆதரவளிப்பதற்கான ஒரு தளத்தை உருவாக்க உதவும், மேலும் இந்த தொழிலாளர்கள் எதிர்கொள்ளும் பிரச்சினைகளின் தரவுத்தளத்தை தொகுக்க உதவுகிறது, என்றார். இத்தகைய முன்முயற்சிகளைத் தக்கவைத்துக்கொள்வது பெரிய முதலீட்டை எடுக்காது; CSR நிதிகள் போன்ற உதவி தேவைப்படலாம்.

"நாங்கள் மாநில அரசுகளுடன் இணைந்து பணியாற்ற முயற்சிக்கிறோம், ஆனால் அது அரசாங்கங்கள் காட்டும் ஆர்வத்தைப் பொறுத்தது. லக்னோவில் உள்ள தொழிலாளர் துறை எங்கள் புகார்களுக்கு உடனடியாக பதிலளிக்கிறது மற்றும் முதலாளிகளுக்கு நோட்டீஸ் அனுப்புகிறது" என்று தர் கூறினார். மத்திய அரசுடன் தொடர்பு கொள்ள ஹெல்ப்லைனுக்கு இன்னும் வாய்ப்பு கிடைக்கவில்லை என்றும் அவர் கூறினார்.

*அடையாளத்தைப் பாதுகாக்க, பெயர் மாற்றப்பட்டுள்ளது