புதுடெல்லி: இங்கிலாந்தை சேர்ந்த பொது சுகாதார மருத்துவரும் தொற்றுநோயியல் நிபுணருமான ஜம்மி நாகராஜ் ராவ், இந்தியாவின் மருத்துவப்பரிசோதனை பதிவேட்டில் பதிவுசெய்யப்பட்ட சுமார் 477 கோவிட்-19 பரிசோதனைகளை ஆய்வு செய்துள்ளார். இவற்றில் சுமார் 192 கண்காணிப்பு ஆய்வுகள் என்பது, பலகட்ட சீரற்ற மருத்துவ பரிசோதனைகள் கிடையாது. குறைந்தது 53 பேர் பாரம்பரிய இந்திய வைத்தியம் மற்றும் ஹோமியோபதிக்கான பரிசோதனைகளை செய்கின்றனர்.

"இதில் பலவும் மோசமாக வடிவமைக்கப்பட்டுள்ளன; சிலவற்றில் வெளிப்படையான தீங்கு உள்ளன,” என்றார் ராவ். இந்தியா நடத்தி வரும் தடுப்பூசி சோதனைகள் குறித்து சிறப்பு எச்சரிக்கையும் அவர் செய்தார்: "மருந்து பரிசோதனைகள் மூலம், ஏற்கனவே நோய்வாய்ப்பட்ட ஒருவருக்கு மறுபயன்பாட்டு மருந்து வழங்கப்படுகிறது. தடுப்பூசி சோதனைகளில், பாதிக்கப்படாதவர்களுக்கு முற்றிலும் புதிய உருவாக்கம் வழங்கப்படும். சோதனைகள் மிகவும் பாதுகாப்பாக வலுவாக செய்யப்பட வேண்டும்” என்றார்.

கோவிட்19-க்கு சிகிச்சைக்கான மருந்துகளுக்கு இந்தியாவில் நடத்தப்படும் மருத்துவப்பரிசோதனைகள், அவற்றை நம்பகமானதாக மாற்றுவதற்கு தேவையான தீவிரத்தை கொண்டிருக்கவில்லை என்று மருத்துவ ஆராய்ச்சியாளர்கள் இந்தியா ஸ்பெண்டிடம் தெரிவித்தனர். உலக சுகாதார அமைப்பின்படி, இந்த சோதனைகள் சீரற்ற (ரேண்டம்), கட்டுப்படுத்தப்பட்டதாக இருக்க வேண்டும். ஆனால் தற்போதைய இந்திய பரிசோதனைகள் குறைந்த எண்ணிக்கையிலான பங்கேற்பாளர்களையே கொண்டுள்ளன; அவை மோசமான மற்றும் பக்கச்சார்பான ஆய்வு வடிவமைப்பால் வகைப்படுத்தப்படுவதாக நிபுணர்கள் தெரிவித்தனர். இந்த சோதனைகள் உலகளவில் ஏற்றுக்கொள்ளப்பட்ட நல்ல நடைமுறையுடன் சக மதிப்பாய்வு செய்யப்பட்ட ஆராய்ச்சி பத்திரிகைகளில் வெளியிடவில்லை.

இன்றுவரை, 28 லட்சத்திற்கும் அதிகமான இந்தியர்களை பாதித்துள்ள மற்றும் ஆகஸ்ட் 20 வரை இந்தியாவில் 53,000 க்கும் அதிகமான இறப்புகளை ஏற்படுத்திய சார்ஸ்- கோவ்- 2 வைரஸை குணப்படுத்தவோ அல்லது தடுக்கவோ எந்தவொரு மருந்து அல்லது தடுப்பூசி பயனுள்ளதாக இல்லை. இந்திய மருந்தக நிறுவனங்கள் பழைய மருந்துகளை மீண்டும் உருவாக்க அல்லது நோய்க்கு சிகிச்சையளிக்க மாற்று சிகிச்சை முறைகளையே வழங்குகின்றன, அதே நேரம் மருந்து கட்டுப்பாட்டாளர்களால் ஏற்றுக்கொள்ளப்பட்ட ஆராய்ச்சி விதிமுறைகளை, அவை புறந்தள்ளி அவற்றை விரைந்து அங்கீகரிக்க வருகின்றனர். இந்த அவசரம் கேள்விக்குரிய முடிவுகளைத் தருவதாக, ராவ் போன்ற நிபுணர்கள் அஞ்சுகிறார்கள்.

“இது எலக்ட்ரிக் டோஸ்டர் அல்லது பாராசிட்டமால் மாத்திரைகளாக இருந்தாலும், மோசமான நடைமுறையில் இருந்து நம்மைப் பாதுகாக்க பொது மருந்து கட்டுப்பாட்டாளர்களின் நம்பகத்தன்மை மற்றும் ஒருங்கிணைப்பை நாம் சார்ந்துள்ளோம். தீவிர நோய்களால் பாதிக்கப்பட்ட நோயாளிகளுக்கு மருத்துவ ஆராய்ச்சியில் மிக உயர்ந்த தரத்தை பராமரிக்க தொழில் மற்றும் கட்டுப்பாட்டாளர்களை நம்புவதைத் தவிர வேறு வழியில்லை, இதனால் அவர்கள் எடுத்துக் கொள்ளும் மருந்துகள் பாதுகாப்பானவை மற்றும் பயனுள்ளவை ”என்று ராவ் கூறினார்.

ஏற்றுக்கொள்ளப்பட்ட ஆராய்ச்சி விதிமுறைகளைத் தவிர்த்து மருத்துவ பரிசோதனைகள் மூலம், இந்திய மருத்துவ பரிசோதனைகளில் ஆராயப்படும் மருந்துகள் குறித்து சரியான முடிவை மேற்கொள்ள, டாக்டர்களுக்கும் நோயாளிகளுக்கும் போதிய தரவு உள்ளதா?"நமது மருத்துவமனையில், ஆதாரங்களை அடிப்படையாகக் கொண்ட மருந்தை நாம் உறுதியாக நம்புகிறோம். எனவே, எல்லோரும் பேசும் கோவிட்19-க்கான மருந்துகளை - அதாவது டோசிலிசுமாப், ஹைட்ராக்ஸி குளோரோகுயின் அல்லது ஃபேவிபிராவிர் போன்றவற்றை நாம் பரிந்துரைக்கவில்லை. இந்த மருந்துகளை நானே எடுத்துக்கொள்ள மாட்டேன். நாம் வலுவான ஆதாரங்களை பார்க்க வேண்டும்,”என்று மகாராஷ்டிராவின் மகாத்மா காந்தி மருத்துவ அறிவியல் கழகத்தின் இயக்குநரும் மருத்துவப் பேராசிரியருமான எஸ்.பி.காலந்திரி கூறினார்.

இந்த மருந்துகளில் பெரும்பாலானவை மறுஉருவாக்கம் செய்யப்பட்டு மறு ஆய்வு செய்யப்பட்டன என்பது, மருத்துவச்சோதனை தரங்களை புறந்தள்ள முடியும் என்று பொருளல்ல என்று கலந்த்ரி கூறினார். "மறுஉருவாக்கப்பட்ட மருந்து மூலம், பக்க விளைவுகளை அறிவோம். ஆனால் அதைத்தவிர கோவிட்-19 போன்ற ஒரு புதிய நிலைக்கு அதன் செயல்திறன் குறித்து நம்மிடம் எந்த தகவலும் இல்லை. எனவேஇன்னும் அதிக சக்தி வாய்ந்த மருத்துவப்பரிசோதனைகள் தேவை,” என்று அவர் கூறினார்.

சிறிய சோதனை அளவுகள்

கோவிட்19-க்கான இந்திய மருத்துவப்பரிசோதனைகளை மதிப்பிடுவதற்கு மாதிரி அளவாக ஒரு மெட்ரிக்கை கருதுவோம்:

  • பயோகனின் மருந்து உருவாக்கம் ஐடோலிஸுமாப் (பொதுவாக தடிப்புத்தோல் அழற்சிக்கு சிகிச்சையளிக்கப் பயன்படுகிறது) மருந்துக்கான இரண்டாம் கட்ட சோதனையில் 30 பங்கேற்பாளர்கள் இருந்தனர். மருந்து சீராக்கி பின்னர் கட்டாய கட்டம் 3 சோதனையை முழுவதுமாக தள்ளுபடி செய்தார். விரைவில், அரசால் நியமிக்கப்பட்ட கோவிட்-19 க்கான தேசியப்பணிக்குழு இந்த மருந்து குறித்து கூடுதல் ஆதாரங்களை வழங்குமாறு நிறுவனத்திடம் கேட்டுக்கொண்டது.
  • கொரோனி என்ற பதஞ்சலி மருந்துக்கான சோதனைக்கு 100 பங்கேற்பாளர்கள் இருந்தனர், இது கோவிட் -19 க்கு ஒரு "சிகிச்சையில் குணம் " என்று கூறப்படும் ஒரு மூலிகை கலவையாகும். இந்த நிறுவனம் கோவிட் சிகிச்சைக்கு மருந்து என்று விளம்பரப்படுத்தத் தொடங்கியதும், அதன் மீதான ஆராய்ச்சி மேலும் சரிபார்க்கப்படும் வரை, விளம்பரத்தை நிறுத்துமாறு அரசு கேட்டுக் கொண்டது.
  • க்ளென்மார்க்கின் ஃபேவிபிராவிர் என்ற ஆன்டிவைரல் மருந்தின் 3ம் கட்ட சோதனைக்கு 150 நோயாளிகள் இருந்தனர்; அதேநேரம் மூன்றாம் கட்ட சோதனைகள் பொதுவாக மிகப்பெரியவை. மருந்து கட்டுப்பாட்டாளருக்கு தனிப்பட்ட முறையில் அளிக்கப்பட்ட தரவுகளின் அடிப்படையில், இந்தியாவின் மருந்து கட்டுப்பாட்டாளரால் நிறுவனத்திற்கு விரைவான அங்கீகாரம் வழங்கப்பட்டது. விரைவில், நிறுவனம் அதன் பயன்பாடு மற்றும் அதிக விலை நிர்ணயம் குறித்து தவறான கூற்றுக்களை வழங்கியதற்காக அதே கட்டுப்பாட்டாளரால் விளக்கம் கேட்கப்பட்டது.

கோவிட்-19 ஐ கையாளும் மருந்துகளுக்கான வெளிநாடுகளில் உள்ள மிக முக்கியமான சோதனைகளின் மாதிரி அளவுகளுடன் இந்த சோதனைகளை வேறுபடுத்த வேண்டும் - உதாரணமாக இங்கிலாந்தில் ரெகவரி (RECOVERY) சோதனை மற்றும் உலக சுகாதார அமைப்பு (WHO) தலைமையிலான சாலிடாரிட்டி (SOLIDARITY) சோதனை. மார்ச் முதல், ரெகவரி சோதனை 176 செயலில் உள்ள தளங்களில் 12,240 பங்கேற்பாளர்களை கோவிட்19-க்கான ஆறு வகையான சிகிச்சைகள் குறித்து ஆய்வு செய்துள்ளது. உலக சுகாதார அமைப்பின் சாலிடாரிட்டி சோதனை, 2020 ஜூலை 1 நிலவரப்படி 21 நாடுகளில் கிட்டத்தட்ட 5,500 நோயாளிகள் பங்கேற்பாளர்களுடன் பரவியது.

இங்கிலாந்தில் ரெகவரி சோதனை ஒரு பெரிய, வலுவான சோதனையை விரைவாகவும் வெளிப்படையாகவும் நடத்துகிறது; இது பயனுள்ள ஒரு மாதிரியாகும். எடுத்துக்காட்டாக, டெக்ஸாமெதாசோன் 6,425 பங்கேற்பாளர்களையும், ஹைட்ராக்ஸி குளோரோகுயின் 4,674 பங்கேற்பாளர்களையும் கொண்டிருந்தது. இந்த இரு மருந்துகளை பற்றிய ஆய்வுகள் முடிந்துள்ளன; தீவிர சுவாச சிக்கல்கள் உள்ள நோயாளிகளில் டெக்ஸாமெதாசோன் பரிசோதித்ததில், இறப்பைக் குறைத்தது என்றும், கோவிட்-19 உடன் மருத்துவமனையில் சேர்க்கப்பட்ட நோயாளிகளுக்கு ஹைட்ராக்ஸி குளோரோகுயின் எந்த பலனையும் தரவில்லை என்றும் அவர்கள் முடிவுக்கு வந்தனர்.

அதிக எண்ணிக்கையில் ஆட்சேர்ப்புக்கு முன்னுரிமை தரும் வகையில் ரெகவரி வடிவமைக்கப்பட்டுள்ளது. இங்கிலாந்தில் உள்ள ஒவ்வொரு கோவிட்-19 நோயாளியும் பங்கேற்க அழைக்கப்படுவதாக அதன் இணையதளம் தெரிவித்தது; மருத்துவமனையில் அனுமதிக்கப்பட்டவர்களில் 13% பேர், இப்பரிசோதனையில் பங்கேற்க ஒப்புக் கொண்டனர். "வலுவான சான்றுகளை" பெற, சோதனைக்கு 2,000 பங்கேற்பாளர்கள் "அதிக எண்ணிக்கையில்" தேவைப்படும் என்று அந்த இணையதளம் தெரிவித்துள்ளது. இந்த உந்துதல், இந்தியாவை விட மிகக்குறைந்த மக்கள்தொகை மற்றும் குறைந்த கோவிட்-19 எண்ணிக்கையைக் கொண்டிருந்த போதும் இங்கிலாந்தால் இவ்வளவு பெரிய சோதனையை மேற்கொள்ள முடிந்தது.

சிறந்த ஆராய்ச்சி பத்திரிகைகளில் இடம்பெறவில்லை

ஆராய்ச்சிகளுடன் இணைந்து மருத்துவப் பரிசோதனையின் முடிவுகளை வெளியிடுவது ஒரு நல்ல நடைமுறையாக கருதப்படுகிறது. ஆனால் கோவிட் -19 (பயோகான், க்ளென்மார்க் அல்லது பதஞ்சலி) கையாள்வதில் தங்களது உத்திகளை திறம்பட அறிவித்த இந்திய நிறுவனங்கள் எதுவும், தங்கள் கண்டுபிடிப்புகளை அறிவித்த சில வாரங்களில், அறியப்பட்ட சிறந்த மதிப்பாய்வு செய்யப்பட்ட பத்திரிகைகளில் தங்களது ஆராய்ச்சியை வெளியிடவில்லை. அதற்கு பதிலாக, சோதனைகளின் விவரங்கள் செய்தி வெளியீடுகள் மற்றும் பத்திரிகையாளர் சந்திப்புகள் மூலம் தெரிவித்து வருகின்றன.

“வைரஸ் கண்டுபிடிக்கப்பட்ட சில மாதங்களிலேயே ரெக்வரி மற்றும் சாலிடாரிட்டி போன்ற சோதனைகள் மற்றும் தேசிய சுகாதார நிறுவனங்கள் மற்றும் வூஹானில் உள்ள விஞ்ஞானிகள் தங்கள் பரிசோதனைத் தரவை மதிப்புமிக்க மருத்துவப் பத்திரிகைகளில் வெளியிட முடிந்தது. இது கோவிட் சிகிச்சைகளை பெரிதும் பாதித்தது. இதற்கு நேர்மாறாக, இந்திய விஞ்ஞானிகள் தொற்றுநோயை ஆராய்வதற்கு நல்ல ஆய்வுகளை வெளியிடவில்லை - இது ஒரு வாய்ப்பை தவறவிட்ட சந்தர்ப்பமாகும்” என்றார் கலந்த்ரி.

தொற்றுநோய் மூலம், உலகம் முழுவதும் உள்ள விஞ்ஞானிகளால் ஒரு பெரிய அளவிலான அறிவியல் கட்டுரைகள் முன் அச்சிடப்பட்ட வடிவத்தில் (சக மதிப்பாய்வுக்கு முன் வெளியிடப்பட்ட பதிப்புகள்) அல்லது சக மதிப்பாய்வு செய்யப்பட்ட ஆவணங்களாக (எடுத்துக்காட்டுகள் இங்கே, இங்கே மற்றும் இங்கே) வெளியிடப்பட்டுள்ளன. உலகம் முழுவதும் உள்ள ஆராய்ச்சியாளர்களால் தரவுகள் ஆராயப்படுகின்றன, அவற்றின் ஆவணங்கள் உறுதிப்படுத்தப்பட்டுள்ளன அல்லது நீக்கப்பட்டன, மேலும் திரும்பப் பெறப்பட்டுள்ளன.

உலகம் முழுவதும் உள்ள ஆராய்ச்சியாளர்களால் வெளியிடப்பட்ட படைப்புகளில் இருந்து பெறப்பட்ட கோவிட்-19 சிகிச்சையின் தற்போதைய ஆதாரங்களை மறுஆய்வு செய்வதன் மூலம் தொடர்ந்து புதுப்பிக்கப்பட்ட தரவுத்தளத்தை, பிரிட்டிஷ் மெடிக்கல் ஜர்னல் (BMJ) பராமரித்து வருகிறது. சோதனை குறித்த தகவல் வெளியிடப்படும் போது, இத்தளம் புதுப்பிக்கப்படுகிறது.

ஆனால் இந்த மெட்டா பகுப்பாய்வில் (பல அறிவியல் ஆய்வுகளின் முடிவுகளை இணைக்கும் ஒரு பகுப்பாய்வு) எந்த இந்திய ஆராய்ச்சியும் இடம்பெறவில்லை. இந்த தரவுத்தளத்தில் பணிபுரியும் ஆராய்ச்சியாளர்களில் ஒருவர் இந்தியா ஸ்பெண்டிடம் கூறுகையில், பகுப்பாய்வு "அச்சுக்கு முன் மற்றும் வெளியிடப்பட்ட சோதனைகளைப் பார்க்கிறது, இந்தியாவில் இருந்து யாரும் இல்லை"என்றார்.

வெளிப்படைத்தன்மை சிக்கல்கள் காட்டப்பட்டுள்ளன

கோவிட்19 தொற்றுநோய்க்கு முன்பே இந்திய மருத்துவ ஆராய்ச்சியில் உள்ள பிரச்சினைகள் குறித்து இந்தியாவின் பொது சுகாதார சமூகம் எச்சரிக்கையாக உள்ளது.

"இந்த தொற்றுநோய்களின் போது நாம் மருத்துவப் பரிசோதனைகளைச் செய்திருக்க வேண்டும், இது நாம் பெருமைப்படக்கூடியது, இது உலகிற்கு முன்னோக்கி செல்லும் வழியைக் காட்டியது. 130 கோடி மக்கள் மற்றும் 500-க்கும் மேற்பட்ட மருத்துவக்கல்லூரிகளைக் கொண்ட நாட்டில், நாம் சோதனைகளை முடித்து, சொந்த மருத்துவத்தரவுகளை உருவாக்கி இருக்க முடியும்,”என்றார் கலந்த்ரி.

பிரச்சனை என்னவென்றால், பாரம்பரியமாக இந்தியாவில் மருத்துவ பரிசோதனைகள் பற்றி குறைவான ஆய்வுகளே உள்ளன, பெரும்பாலும் செலவுகளைக் குறைப்பதில் முக்கியத்துவம் கொடுக்கப்படுகிறது என்று, இந்திய மருத்துவ ஆராய்ச்சி சங்கத்தின் முன்னாள் தலைவர் அருண் பட் கூறினார்.

"இந்தியாவில் நாம் எப்போதும் சிறிய சோதனைகளைச் செய்துள்ளோம், ஒரு பரிசோதனை செய்ய விரும்புவோரை, அதிக பங்கேற்பாளர்களை கொண்டு செய்யும்படி இந்திய மருந்து கட்டுப்பாட்டாளர் அடிக்கடி கேட்கவில்லை. எனவே வெளிப்படையாக, ஒரு பார்மா நிறுவனத்தைப் பொறுத்தவரை, ஒரு சோதனையில் எந்த கூடுதல் நோயாளியும் அவர்களுக்கு ஒரு கூடுதல் செலவாகும். மேலும் நோயாளிகளை உள்ளே வருமாறு யாரும் கேட்கவில்லை என்றால், அவர்கள் ஏன் இருந்தாக வேண்டும்? ” என்றார் பட்.

ஆகஸ்ட் 5, 2020 அன்று, 12 சுகாதார வல்லுநர்கள் மற்றும் சிவில் சமூக ஆர்வலர்கள், இந்தியாவில் நடக்கும் மருத்துவப்பரிசோதனைகள் மற்றும் மருந்து ஒழுங்குமுறைகளில் அதிக வெளிப்படைத்தன்மை தேவையென வலியுறுத்தி, மத்திய சுகாதார அமைச்சகத்திற்கு கடிதம் எழுதினர். மருத்துவப்பரிசோதனைகளுக்கு அனுமதி வழங்குவது தொடர்பான நெறிமுறைகள் குழு, விவாத நெறிமுறைகளை மருத்துவச் சோதனை பதிவேட்டில் பதிவேற்ற வேண்டும் எனவும் அவர்கள் கேட்டுக் கொண்டனர். முதன்மை தரவுத் தொகுப்புகள் பற்றிய தகவல்களை வெளியிடுவதற்கு புலனாய்வாளர்களை பதிவகம் கேட்கவில்லை என்றும், இது மருந்து நிறுவனங்களை செர்ரி-பிக் தரவை அனுமதிக்கக்கூடும் என்றும் அவர்கள் சுட்டிக்காட்டினர். கோப்பு குறிப்புகள் மற்றும் மருந்துகளை ஒப்புதல் / நிராகரிப்பதற்கான காரணங்கள் பகிரங்கப்படுத்தப்பட வேண்டும் என்றார்.

தொற்றுநோய்களின்போது மருத்துவப்பரிசோதனைகளை எவ்வாறு சிறப்பாக நடத்துவது என்பது குறித்த குறிப்பிட்ட ஆலோசனையுடன் இந்தியன் சொசைட்டி ஃபார் கிளினிக்கல் ரிசர்ச், இந்திய அரசுக்கு மார்ச் மாதம் எழுதினர். அவர்கள் தங்களது குறிப்பில், மற்ற நாடுகளில் உள்ள சிறந்த நடைமுறைகளுக்கான இணைப்புகளையும் அனுப்பியுள்ளனர்.

(பூயான், இந்தியா ஸ்பெண்ட் சிறப்பு நிருபர்).

உங்களின் கருத்துகளை வரவேற்கிறோம். கருத்துகளைrespond@indiaspend.org. என்ற முகவரிக்கு அனுப்பலாம். மொழி, இலக்கண நடை கருதி அவற்றை திருத்தும் உரிமை எங்களுக்கு உண்டு.

Anoo Bhuyan

    அனு பூயான், இந்தியாஸ்பெண்டில் உடல்நலம் சார்ந்தவை குறித்து எழுகிறார். சட்டம் & நீதி, தொழில்நுட்பம், சமூகம் மற்றும் பாலினம் தொடர்பான பிரச்சினைகள் குறித்தும் அவர் எழுதி இருக்கிறார். இந்தியாஸ்பெண்டிற்கு முன்பு அவர், தி வயர், அவுட்லுக் இதழ், பிபிசி நியூஸ் மற்றும் நேஷனல் பப்ளிக் ரேடியோ ஆகியவற்றில் பணியாற்றியுள்ளார். மணிப்பூர் நீதித்துறை கூடுதல் கொலைகள் என்பது குறித்த அவரது செய்திக்காக, 2018 ஆம் ஆண்டில் போர்ன்மவுத் பல்கலைக்கழகத்தின் ‘மாற்றத்திற்கான பத்திரிகையாளர்’ விருதை வென்றார். லண்டன் பல்கலைக்கழகத்தின் ஸ்கூல் ஆப் ஓரியண்டல் அண்ட் ஆப்ரிக்கன் ஸ்டடீஸ் முதுகலை பட்டத்திற்கான உதவித்தொகையும் பெற்றார். டிவிட்டரில் அவரை www.twitter.com/AnooBhu என்ற முகவரியில் அணுகலாம்.