கடலின் வெளிப்பாட்டால் மீனவர்களுக்கு காலநிலை அபாயங்களை கையாள சிறந்த காப்பீடு தேவை

போஸா, மீனவ சமூகத்தின் மற்றவர்களைப் போலவே, தொற்றுநோயால் ஏற்பட்ட இழப்புகளில் இருந்து இன்னும் மீளவில்லை. ஆனால், கடந்த சில ஆண்டுகளாக இந்தியாவின் கடலோரப் பகுதிகளில் அடிக்கடி மற்றும் தீவிரமான புயல் மற்றும் பெருமழை பெய்து வருவதால், அவர்களின் பிரச்சனை மேலும் மோசமடைந்துள்ளது. போஸா மற்றும் அவரது 12-குழுவினர் இப்போது தங்கள் படகுகளில் இருந்து புறப்படும்போது, அவர்கள் பாதுகாப்பாக வீடு திரும்புவார்களா என்று உறுதியாக தெரியவில்லை. சில நாட்களுக்கு முன்பு, அவரது நண்பர் ஒருவர் கடலில் தனது குழு உறுப்பினரை இழந்தார். உத்தனுக்கு வடக்கே 80 கிமீ தொலைவில் உள்ள பால்கர் மாவட்டத்தில் உள்ள துறைமுகத்தில், அவரது சடலம் மிதப்பது கண்டுபிடிக்கப்பட்டது.

"நான் கடந்த 30 வருடங்களாக மீன்பிடி தொழிலில் ஈடுபட்டு வருகிறேன், ஆனால் கடந்த சில வருடங்களில் எனக்கு ஏற்பட்ட இழப்பு மற்றும் சேதத்தை, இதுவரை கடலில் சந்தித்ததில்லை" என்று போசா கூறினார். இந்த ஆண்டு எதிர்பாராத கோடை மழை, அவர் உலர வைத்த ரூ.2 லட்சம் மதிப்புள்ள மீன்களையும் சேதப்படுத்தியது.

லியோ கோலாகோ, உத்தனில் ஒரு மீன்பிடி கூட்டுறவு சங்கத்தை நடத்துகிறார், அதன் பெயர் உத்தான் மச்சிமர் விகாஸ் சொசைட்டி லிமிடெட். அதன் 115 உறுப்பினர்கள் இப்போது அடிக்கடி காப்பீட்டு கோரிக்கைகள், கடன்கள் மற்றும் மானியங்கள் உதவியை நாடுவதாகக் கூறினார். "புயல்கள் மற்றும் கனமழை போன்ற அடிக்கடி வானிலை நிகழ்வுகளுக்குப் பிறகு, மீன்பிடி வணிகம் மிகவும் ஆபத்தானதாகிவிட்டது" என்று கோலாகோ கூறினார்.

இந்தியாவின் 8,000 கிமீ கடலோரப்பகுதி, மீன்பிடித் துறையில் உள்ள கிட்டத்தட்ட 28 மில்லியன் தொழிலாளர்களுக்கு வாழ்வாதாரமாக உள்ளது, இதில் விற்பனையாளர்கள், படகு உரிமையாளர்கள் மற்றும் ஆபரேட்டர்கள், மீன் பதப்படுத்த உதவும் ஐஸ்களை வைத்திருக்கும் 'ஐஸ் உடைப்பவர்கள்', டிரைவர்கள் மற்றும் போக்குவரத்துக்குப் பயன்படுத்தப்படும் வாகனங்களின் உரிமையாளர்கள் பிடிப்பு மற்றும் பலர். அவர்களில், 67% பேர் வறுமைக் கோட்டுக்குக் கீழே வாழ்கின்றனர் என்று, அரசு நடத்தும் மத்திய கடல் மீன்வள ஆராய்ச்சி நிறுவனம் (CMFRI) நடத்திய, 2016 தேசிய கடல் மீன்வளக் கணக்கெடுப்பு தெரிவிக்கிறது.

அசாதாரண தீவிர வானிலை நிகழ்வுகள் இந்தியாவின் கடற்கரையில் காணப்படுகின்றன. உதாரணமாக, மே 2021 இல், இந்தியாவின் மேற்கு கடற்கரையில் கடுமையான தவ்தே புயல் கரைகடந்தது, ஆனால் அரபிக்கடலில் சூறாவளி புயல்கள் அரிதாகவே உருவாகின்றன, இது கடல்களின் வெப்பமயமாதலைக் கண்டறியலாம் என்று, மே 2021 இல் நாங்கள் கட்டுரை வெளியிட்டோம்.

கடலோர காலநிலை பேரிடர்கள், மீனவர்களின் வாழ்வாதாரத்தை பல வழிகளில் பாதிக்கலாம் - அவை கடலில் இறப்பு மற்றும் காயங்களை ஏற்படுத்துவது மட்டுமல்லாமல் விலையுயர்ந்த மீன்பிடி சாதனங்களுக்கு இழப்பு அல்லது சேதத்தை ஏற்படுத்துகின்றன, மீன் கொண்டு வருவதில் பெரிய அளவிலான சரிவு மற்றும் மீன் வளர்ப்பு பண்ணைகள், மீன் வளர்ப்பில் பயன்படுத்தப்படும் கடல் கூண்டுகள், சேமிப்பு உள்கட்டமைப்பு போன்ற சொத்துகளுக்கு சேதம் உண்டாகிறது.

இந்த இழப்புகள், வழக்கமான காப்பீட்டுத் திட்டங்களின் கீழ் ஈடுசெய்யப்படுவதில்லை. தற்போது, ​​மீனவர்கள் விபத்துகள், இறப்பு மற்றும் வேறு சில வகையான இழப்புகளுக்கு எதிரான காப்பீட்டை அணுகுகின்றனர். மத்திய அரசு, குழு விபத்து காப்பீட்டை வழங்குகிறது, இது முழு மீன்பிடி குழுவினருக்கும் கடலில் விபத்து அல்லது இறப்புக்கு எதிராக பாதுகாப்பு அளிக்கிறது. நியூ இந்தியா அஷ்யூரன்ஸ் கம்பெனி லிமிடெட், ஓரியண்டல் இன்சூரன்ஸ் கம்பெனி லிமிடெட் மற்றும் யுனைடெட் இந்தியா இன்சூரன்ஸ் கம்பெனி லிமிடெட் போன்ற பொது காப்பீட்டு நிறுவனங்களில் இருந்து மீன்பிடி கப்பல்களை மொத்தமாக அழிந்தாலோ, அல்லது இழந்தாலோ காப்பீடு கிடைக்கிறது. சில தனியார் காப்பீட்டாளர்கள் கூடுதல் பிரீமியத்தில் மீன்பிடி இழப்பை ஈடுகட்டுகின்றனர்.

"பாதகமான காலநிலை நிலைகளின் காரணமாக வேலை நாட்களின் இழப்பு, கப்பல்களின் இழப்பு மற்றும் சேதம், சொத்து மற்றும் இறப்பு அதிகரித்து வருகிறது. இந்த திட்டங்களின் கீழ் வழங்கப்பட்ட தற்போதைய பேரிடரின் கீழ் சூழல்களுடன் இது பொருந்தவில்லை, " என்று, கடல் பாதுகாப்பு மற்றும் சுற்றுச்சூழல் நிலைத்தன்மையில் செயல்படும் பெங்களூரை தளமாகக் கொண்ட ஆராய்ச்சி நிறுவனமான தக்ஷின் அறக்கட்டளையின் ஆதித்யா பிள்ளை கூறினார்.

காலநிலை பேரிடரை சமாளிக்க நடவடிக்கைகள் தேவை

வேளாண் அமைச்சகம், 2003 இல் வானிலை அடிப்படையிலான குறியீட்டு காப்பீட்டுத் திட்டத்தை அறிமுகப்படுத்தியது, ஆனால் விவசாயிகளுக்கு மட்டுமே பயனளிக்கிறது. 2016 ஆம் ஆண்டில், பிரதம மந்திரி ஃபசல் பீமா யோஜனா அல்லது பிரதமரின் பயிர் காப்பீட்டுத் திட்டம், வானிலை குறியீட்டு காப்பீட்டை மாற்றுவதன் மூலம், பாதகமான வானிலையால் ஏற்படும் பயிர் இழப்புகளை ஈடுசெய்யத் தொடங்கியது. இருப்பினும், மீன்வளத் துறைக்கு, இத்தகைய இணையான திட்டம் எதுவும் இல்லை.

காலநிலை மாற்றத்தால் ஏற்படும் பேரிடர்களால் பாதிக்கப்பட்ட வாழ்வாதாரங்களுக்கு உதவ என்ன செய்ய முடியும்? பிப்ரவரி 2021 அறிக்கையில், ஐக்கிய நாடுகள் சபையின் உணவு மற்றும் வேளாண்மை அமைப்பு, கோவிட் -19 தொற்றுநோயில் இருந்து மீட்க, மீனவர்களுக்கு உதவ சமூக பாதுகாப்பு நடவடிக்கைகளை கொண்டு வருமாறு தேசிய அரசுகளை கேட்டுக்கொண்டது.

"வருமான ஆதரவு திட்டங்கள் மற்றும் சிறந்த சமூக ஆதரவு அமைப்புகள் இயற்கை பேரிடர் அல்லது கோவிட் போன்ற அமைப்பு ரீதியான அதிர்ச்சிகளை உறிஞ்சுவதற்கு உதவுகின்றன. அவை ஒட்டுமொத்த பாதிப்பையும் எதிர்மறை சமாளிக்கும் உத்திகளையும் அதிகரிக்கின்றன" என்று, தக்ஷின் அறக்கட்டளையின் பிள்ளை கூறினார். "காப்பீட்டுத் திட்டங்கள் தொழில்சார் அபாயங்கள், நிச்சயமற்ற நிலைகள் மற்றும் மீனவர்களுக்கு இணை மற்றும் பிரீமியம் செலுத்துவதற்கான திறனுக்கு ஏற்றதாக இருக்க வேண்டும்" என்றார்.

பல மேற்கத்திய நாடுகள் அதிகப்படியான மழைப்பொழிவு அல்லது குறிப்பிட்ட மக்களை பாதிக்கும் வறட்சி போன்ற காலநிலை அபாயங்களை மறைக்க வானிலை குறியீட்டு காப்பீட்டை வடிவமைத்துள்ளன. 2007 ஆம் ஆண்டில், மத்திய அமெரிக்கா மற்றும் கரீபியனில் உள்ள 23 நாடுகள் வெப்பமண்டல சூறாவளிகள், பூகம்பங்கள் மற்றும் அதிக மழைப்பொழிவு போன்ற இயற்கை ஆபத்துகளின் நிதி தாக்கத்தை ஈடுசெய்ய ஒரு கரீபியன் பேரழிவு ஆபத்து காப்பீட்டு வசதியை உருவாக்கியது. இந்தக் கருவியானது ஒரு குறிப்பிட்ட மீன்வளக்கொள்கை, கரீபியன் பெருங்கடல் மற்றும் மீன் வளர்ப்பு நிலைத்தன்மை வசதி (COAST) ஆகியவற்றைக் கொண்டுள்ளது.

காலநிலை ஆபத்து காப்பீடு நிறுவனங்களால் பாதிக்கப்படக்கூடிய சமூகங்களை ஆதரிக்கவும், தீவிர வானிலை நிகழ்வுகள் போன்ற தவிர்க்க முடியாத அபாயங்களுக்கு ஈடுசெய்யவும் ஊக்குவிக்கப்படுகிறது.

காலநிலை மாறுபாடுகளுக்கு எதிரான பகுதி பாதுகாப்பு

பிரதம மந்திரி சுரக்ஷா பீமா யோஜனாவின் கீழ் மீனவர்களுக்கான குழு விபத்து காப்பீட்டு திட்டம் போன்ற, பேரிடர் நிவாரண நிதியின் கீழ் வழங்கப்பட்ட ஒரு முறை இழப்பீடு தவிர, மீனவர்கள் மத்திய மற்றும் மாநில அரசுகளால் வழங்கப்படும் விபத்து காப்பீட்டு திட்டங்களை அணுகலாம். 2020 ஆம் ஆண்டில், மத்திய அரசு மத்ஸ்ய சம்பதா யோஜனா (PMMSY) இன் கீழ் மற்றொரு காப்பீட்டுத் திட்டத்தை கொண்டு வந்தது, இது மீனவர்களின் விபத்தில் காயங்கள் அல்லது இறப்புகளுக்கு ரூ. 25,000 முதல் ரூ .5 லட்சம் வரை அதிக பாதுகாப்பு அளிக்கிறது.

இருப்பினும், இதுபோன்ற மாநில மற்றும் மத்திய திட்டங்கள் தீவிர வானிலை நிகழ்வுகளால் ஏற்படும் இழப்பு மற்றும் சேதத்தை ஈடுசெய்யாது என்று சிஎம்எஃப்ஆர்ஐயின் மூத்த விஞ்ஞானி ஷினோஜ் பி. மேலும், விபத்து அபாயங்கள் தவிர, மீன்பிடி கப்பல்களுக்கு இழப்பு மற்றும் சேதம், கியர் மற்றும் மீனவர்களின் சொத்துக்கள் போன்ற துறைகளில் உள்ள மற்ற பெரிய அபாயங்கள் ஓரளவு மட்டுமே தனியார் நிறுவனங்களால் மூடப்படுகின்றன, என்றார்.

நாம் முன்பு கூறியது போல், இந்தியாவின் கடலோரப் பகுதி சமீபத்திய ஆண்டுகளில் தொடர்ச்சியான பேரிடர்களால் பாதிக்கப்பட்டுள்ளது. 2020 ஆம் ஆண்டில், இந்தியாவின் பல்வேறு கடலோரப் பகுதிகளை, நான்கு சூறாவளி புயல்கள் தாக்கின: மே மாதத்தில் ஆம்பன் புயல், கிழக்கு பகுதியையும், ஜூன் மாதத்தில் நிசர்கா புயல், மகாராஷ்டிராவை தாக்கின. நவம்பர் மாதம், நிவர் புயல், தென்கிழக்கு கடலோரப் பகுதியையும், டிசம்பர் தொடக்கத்தில் புரவி புயல் தமிழ்நாடு மற்றும் கேரளாவையும் பாதித்தது. இந்தியாவைச் சுற்றியுள்ள அனைத்து பெருங்கடல்களிலும் சூறாவளிகளின் எண்ணிக்கை அதிகரித்துள்ளது: 2018 மற்றும் 2019 இரண்டு ஆண்டுகளும், மொத்தம் ஏழு சூறாவளி புயல்களை பதிவு செய்துள்ளன, இது ஆண்டு நீண்ட கால சராசரி (1961-2017) 4.5 ஐ விட அதிகமாக உள்ளது என்று, டிசம்பர் 2020 இல் நாங்கள் கட்டுரை வெளியிட்டுள்ளோம்.

உத்தான் பகுதியை சேர்ந்த மீனவர் லைனல் மல்லேகர், 40, இதுபோன்ற பல வானிலை நிகழ்வுகளின் தாக்கத்தை சமாளிக்க வேண்டியிருந்தது. அவர் 2019 இல் புதிய படகை வாங்கியிருந்தார், ஆனால் அது ஏற்கனவே மொத்தம் ரூ .4 லட்சம் செலவில் ஆறு அல்லது ஏழு பெரிய பழுதுபார்ப்புகளைச் செய்துள்ளது. படகிற்கான செலவு அவருக்கு ரூ. 20 லட்சம் ஆனது.

படகு காப்பீடு செய்யப்பட்டிருந்தாலும், மல்லேகரால் பழுதுபார்க்கும் செலவை அதில் பெற முடியவில்லை. "இந்தியாவில் உள்ள படகு, கப்பல் காப்பீடுகள் மொத்த இழப்பை மட்டுமே ஈடுகட்டுகின்றன, அதாவது உங்கள் படகு காணாமல் போனால் மட்டுமே ரூ.10-50 லட்சம் இழப்புக்கு, 1-2 லட்சம் ரூபாயை கோர முடியும்" என்று, கூட்டுறவுக்கான காப்பீட்டு எழுத்தாளரும், உத்தானில் உள்ள மீனவர் கூட்டமைப்பின் தலைவருமான கோலாகோ கூறினார்.

பணம் வழங்கலில் தாமதம்

பொது காப்பீட்டு நிறுவனங்கள் வழங்கும் கப்பல் காப்பீட்டைத் தவிர, மீனவர்களுக்கான விபத்து/இறப்பு காப்பீட்டுத் திட்டங்கள் பெரும்பாலும் மாநில மற்றும் மத்திய காப்பீட்டுத் திட்டங்களின் கீழ் உள்ளன. மத்திய அரசின், செயலில் உள்ள மீனவர்களுக்கான குழு விபத்து காப்பீட்டு திட்டம், மீன்பிடி குழுவினரின் வாழ்க்கை/மாற்றுத்திறன் அபாயங்களை உள்ளடக்கியது. இதன் கீழ், காப்பீடு பெற்றவர், நிரந்தர இயலாமை/விபத்து மரணம் ஏற்பட்டால் ரூ .2 லட்சத்தையும், பகுதி ஊனம் ஏற்பட்டால் ரூ .1 லட்சத்தையும் கோரலாம்.

காப்பீட்டைக் கோருவதற்கான சம்பவங்கள் பற்றிய விசாரணைகளும், நேரத்தை எடுத்துக்கொள்ளும் என்று கோலாகோ கூறினார். "மீனவர்கள், அவர்களைப் பின்தொடர்வதற்கு அரிதாகவே நேரம் கிடைக்கிறது," என்று அவர் கூறினார். 2020 ஜனவரியில் கடலில் நடந்த விபத்தில், தனது குழு உறுப்பினரை இழந்த ராய்டன் டோக்கல்கருக்கு, ஒன்றரை வருடங்கள் கழித்து, 2021 ஜூன் மாதத்தில் அவரது ரூ .1 லட்சம் காப்புரிமை கோரப்பட்டது. உள்ளூர் கூட்டுறவு சங்கங்கள், லியோ கோலாகோவால் நடத்தப்படுவது போன்றவை, காப்பீட்டு உரிமைகோரல்களைத் தள்ளுவதில் முக்கிய பங்கு வகிக்கின்றன.

ஆனால் உயிர் இழப்பு மற்றும் கப்பல்களுக்கு ஏற்படும் சேதம் மட்டும் மீனவர்கள் தாங்க வேண்டிய ஆபத்து அல்ல என்று, சிறிய மற்றும் பாரம்பரிய மீன் தொழிலாளர்கள் சங்கமான தேசிய மீன் தொழிலாளர் மன்றத்தின் தலைவர் நரேந்திர பாட்டீல் கூறினார். "பெரிய கொக்கிகள், கோடுகள், பொறிகள் மற்றும் மீன்பிடி வலைகள் போன்ற உபகரணங்கள், விலை உயர்ந்தவை, ஒவ்வொரு மீனவரும் ஒரு பயணத்திற்கு சுமார் 1 லட்சம் முதலீடு செய்கிறார்கள். புயல்கள் தாக்கும்போது அல்லது மீன் கிடைக்காதபோது, அவர்கள் கையில் வருமானம் இல்லாமல் வீடு திரும்புவார்கள், அதற்கு எந்த ஆதரவும் கிடைக்காது, "என்று அவர் கூறினார்.

'ஒரு முறை பேரிடர் நிவாரணம் போதாது'

நாங்கள் சொன்னது போல், புவி வெப்பமடைதல் காரணமாக ஒப்பீட்டளவில் அரபிக்கடலில் நிலையான காலநிலையை இனி அனுபவிக்க முடியாது. 2020-21-ல் ஆம்பன், யாஸ் மற்றும் தவுக்தே ஆகிய மூன்று புயல்கள் 14,000 படகுகளையும், 78,000 மீன்பிடி வலைகளையும் சேதப்படுத்தியுள்ளன என்று, அரசால் அமைக்கப்பட்ட மத்திய அமைச்சக குழுக்களின் தகவல் தெரிவிக்கிறது. "ஆனால் இதுபோன்ற சேதம் காப்பீடு கோரிக்கைகளில் அரிதாகவே கணக்கிடப்படுகிறது" என்று ஆர்வலர் பாட்டீல் கூறினார்.

பேரிடர் நிவாரணத் திட்டங்கள், வாழ்வாதாரம் பாதிக்கப்பட்டவர்களுக்கு நிதி உதவியை வழங்குகின்றன, ஆனால் இவை காப்பீட்டின் தன்மையில் இல்லை. "வெள்ளம் மற்றும் புயலால் பாதிக்கப்பட்ட கடலோர சமூகங்களின் நிவாரணம் மற்றும் மறுவாழ்வு போன்ற பேரிடர் மேலாண்மை மற்றும் தணிப்புக்கு, குறிப்பிட்ட ஒருமுறை தரப்படும் இழப்பீட்டுத் திட்டங்கள் உள்ளன, ஆனால் மீன்வளத் துறையில் காலநிலை ஆபத்து மற்றும் பின்னடைவு பற்றி வெளிப்படையாகப் பேசும் காப்பீட்டுத் திட்டங்கள் இல்லை" என்று, தக்ஷின் அறக்கட்டளையின் பிள்ளை கூறினார். "கூடுதலாக சில தனியார் திட்டங்கள், மீன்பிடி கப்பல்கள் மற்றும் உபகரணங்கள் சேதத்தை ஈடுசெய்ய உதவுகின்றன, ஆனால் இந்த காப்பீட்டுத் திட்டங்கள் இன்னும் குறைந்த அளவு கவரேஜைக் கொண்டுள்ளன" என்றார்.

ஆந்திராவில், மாநிலத்தில் பதிவு செய்யப்பட்ட 109,231 மீனவர்கள் ஒவ்வொருவரும் தலா ரூ.10,000 நிதி உதவி பெற்றனர். ஏப்ரல் 2020 இல், ஆந்திராவும் குஜராத்தில் பணிபுரியும் 6,000 புலம்பெயர்ந்த மீனவ தொழிலாளர்களுக்கு பயனளிக்கும் வகையில் ரூ .2,000 ஒரு முறை செலுத்துவதாக அறிவித்தது. அதே மாதத்தில், தமிழகத்தில், மாநில மீனவர் நல வாரியத்தில் உறுப்பினர்களாக இருந்த 485,000 மீனவர்கள் மற்றும் மீன் விற்பனையாளர்களுக்கு ஒரு முறை ரூ.1,000 நிதி உதவி வழங்கப்பட்டது. ஜூன் மற்றும் ஜூலை 2020 ல், கேரள அரசு ஒவ்வொரு மீனவருக்கும் ஒரு முறை கோவிட் நிவாரணத் தொகையாக ரூ .2,000 வழங்கியது. தொடர்புடைய துறைகளில் உள்ள ஒவ்வொரு தொழிலாளருக்கும் ரூ .1,000 வழங்கப்பட்டது.

ஒருமுறை பணம் செலுத்துவது சமூகத்தை நீண்ட காலம் தக்கவைக்க முடியாது என்று ஆர்வலர் பாட்டீல் கூறினார். தேசிய மீன் தொழிலாளர் மன்றம் மத்திய அரசுக்கு படகு உரிமையாளர்களுக்கு மாதந்தோறும் ரூ .50,000, குழுவினருக்கு மாதம் ரூ .15,000 மற்றும் மீன் விற்பனையில் ஈடுபடுபவர்களுக்கு மாதம் ரூ. புதிய மீன்பிடி பருவத்தை முன்னிட்டு தேசிய வங்கிகளில் ரூ .5 லட்சம் வரை வட்டியில்லா கடன்களையும் கோரியுள்ளது.

மீனவர்களுக்கு ஏன் காலநிலை ஆபத்து காப்பீடு வழங்கப்படவில்லை என்பது குறித்து அக்டோபர் 5 ம் தேதி மீன்வளம், கால்நடை பராமரிப்பு மற்றும் பால்வளத்துறை அமைச்சகத்தின் கீழ் உள்ள மீன்வளத் துறையிடம் கருத்துகளைக் கேட்டோம். பதிலைப் பெறும்போது, நாங்கள் இக்கட்டுரையைப் புதுப்பிப்போம்.

நீடித்த மீன்பிடித்தலுக்கான முயற்சி

தமிழ்நாட்டின் மீனவ சமூகத்தைச் சேர்ந்த எம்.ஏ.சேகர், வணிக மற்றும் தொழில்துறை அமைச்சகத்தின் கீழ் உள்ள, கடல் பொருட்கள் ஏற்றுமதி மேம்பாட்டு ஆணையத்தில் விநியோகச் சங்கிலி பிரிவில் பணியாற்றியவர், இத்துறையில் மாற்றங்களை பட்டியலிட்டு வருகிறார். சமீபத்தில், மீன்களை இறக்குமதி செய்யும் ஐரோப்பிய நாடுகள், நீடித்த மீன்பிடிக்காக இந்தியாவுக்கு அழுத்தம் கொடுத்து வருகின்றன. எனவே, பிஎம்எம்எஸ்ஒய் போன்ற திட்டங்கள், நீடித்த மீன்பிடிப்பைத் தூண்டுவதற்கு அறிமுகப்படுத்தப்பட்டுள்ளன. ஆனால் மீனவ சமுதாயத்தின் வாழ்வாதாரம், தொழிலாளர் நிலைமைகள் மற்றும் தொழிலாளர் உரிமைகள் ஆகியவற்றைக் கருத்தில் கொள்ளாமல், நீங்கள் எப்படி நிலையான மீன்பிடிப்பை ஊக்குவிக்க முடியும்? " என்று கேள்வி எழுப்பினார். "குறைந்தபட்ச ஆதரவு விலை மூலம் ஆதரிக்கப்படும் விவசாயிகளைப் போலல்லாமல், மீன்வளத் துறையில், மீன்வளத் தொழிலாளர்கள் கார்ப்பரேட் மற்றும் இடைத்தரகர்களின் [சந்தை] சக்திகளால் [மற்றும் செல்வாக்கு] பாதிக்கப்படுகின்றனர்" என்றார்.

செப்டம்பர் 2020 இல், மத்திய மீன்வளம், கால்நடை பராமரிப்பு மற்றும் பால்வளத்துறை அமைச்சகம், பிஎம்எம்எஸ்ஒய் இன் கீழ் ஒரு குழு விபத்து காப்பீட்டை கொண்டு வந்தது, இது, மீனவர்களுக்கு விபத்து காப்பீடு உட்பட ரூ.20,050 கோடி திட்டம். ஆனால் மீன்வளர்ப்பு மற்றும் அதனுடன் தொடர்புடைய உள்கட்டமைப்பு பெறுவதோடு ஒப்பிடும்போது மீனவர் நலனுக்கு 8% நிதி மட்டுமே ஒதுக்கப்பட்டுள்ளது.

செப்டம்பர் 2021 க்குள், தெலுங்கானா, ஒடிசா, திரிபுரா, இமாச்சலப் பிரதேசம், பஞ்சாப், ராஜஸ்தான் மற்றும் சிக்கிம் ஆகிய ஏழு மாநிலங்களைச் சேர்ந்த 1,585,149 மீனவர்கள் மட்டுமே தங்கள் மாநில அரசு பிரீமியத்தை தங்கள் மாநில அரசுடன் செலுத்தி இத்திட்டத்தின் கீழ் வரவழைக்கப்பட்டுள்ளனர். ஆனால் ஆந்திரா, மேற்கு வங்கம், குஜராத், மகாராஷ்டிரா, கேரளா போன்ற பெரிய மீன் உற்பத்தி செய்யும் மாநிலங்கள் தங்கள் பங்கை இன்னும் செலுத்தவில்லை, இதனால் திட்டம் கிடப்பில் உள்ளது.

"மகாராஷ்டிரா போன்ற மாநிலங்கள் மீன்பிடித் துறைக்கு போதுமான பட்ஜெட் தொகையை ஒதுக்கவில்லை. அவர்கள் பிரீமியத்தின் உரிய பங்கை செலுத்த முடியும்" என்று, உத்தான் மீனவர் கூட்டமைப்பின் கோலாகோ கூறினார். கோலாகோவின் அறிக்கைக்கு பதிலளிக்க மகாராஷ்டிரா மாநில மீன்வளத் துறையின் பிராந்திய இயக்குநரைத் தொடர்பு கொண்டோம்.

"முந்தைய, குழு விபத்து காப்பீட்டு திட்டம் மாநிலத்தில் செயல்பாட்டில் உள்ளது. மத்திய, மாநில மற்றும் பயனாளிகளுக்கு இடையில், பிரீமியம் சமமாகப் பிரிக்கப்படுகிறது, ஆனால் பயனாளிகள் திட்டத்திற்கு விண்ணப்பிக்காததால் அதன் பலன்களை வழங்க முடியவில்லை "என்று மகாராஷ்டிரா மாநில மீன்வளத் துறையின் பிராந்திய இயக்குனர் தேவரே கூறினார்.

கடன் சுமை, வாழ்வாதாரம் இழப்பு

மீனவர் விஜய் புர்கவ், புதிய படகை 2020 ம் ஆண்டில் ரூ .50 லட்சத்திற்கு வாங்கினார். "புதிய படகு ஃபைபர் கிளாஸால் ஆனது, முந்தையதைப் போலல்லாமல், இது தேக்கு மரத்தால் ஆனது மற்றும் அதிக நீரோட்டத்தில் சேதமடைகிறது" என்று அவர் கூறினார். ஆனால், படகை வாங்குவதற்கு வங்கிகள் அவருக்கு கடன் கொடுக்கவில்லை, ஏனென்றால் அவரால் நிலையான வருமானத்தைக் காட்ட முடியவில்லை. புர்காவ் ஒரு தனியார் பணம் கடன் வழங்குபவரிடம் இருந்து கடன் வாங்கி முடித்தார், அதை திருப்பிச் செலுத்த குறைந்தது 10 ஆண்டுகள் ஆகும் என்று அவர் கூறுகிறார்.

மீனவர்கள் வழக்கமாக முந்தைய மீன்பிடி பருவத்தில் இருந்து சம்பாதித்ததன் அடிப்படையில், கொள்முதல் மற்றும் பழுதுபார்ப்பதற்காக ரூ 1-2 லட்சம் வரை கடன் பெறுவார்கள். ஆனால் கணிக்க முடியாத வானிலை மாற்றங்களால் வருவாய் குறைந்து வருவதால், அவர்கள் தங்கள் வணிகங்களுக்கு முன்கூட்டியே திட்டமிட முடியாது என்று, கோலாகோ கூறினார்.

தொற்றுநோயின் பொருளாதார விளைவுகளுக்கு பதிலளிக்க, பல மாநிலங்கள் மீன்பிடித் துறையில் உள்ள தொழிலாளர்களுக்கு இழப்பீட்டு நடவடிக்கைகளை அமைத்தன. மத்திய வேளாண் மற்றும் விவசாயிகள் நல அமைச்சகத்தின் கீழ், பிரதம மந்திர் கிசான் சம்மன் நிதி நிவாரணத் திட்டத்தில், ஆரம்பத்தில் மீனவர்கள் விலக்கப்பட்டதை அடுத்து, சிவில் சமூக அமைப்புகள் எதிர்ப்பு தெரிவித்தன.

சிஎம்எஃப்ஆர்ஐ-யின் 2019 ஆய்வின்படி, மீனவர் சமூகம் கடன் சந்தையில் முறைசாரா வீரர்களை நம்பியுள்ளது -ஏலதாரர்-இடைத்தரகர்கள், மூன்றாம் தரப்பு 'பங்குதாரர்கள்' (முறைசாரா அடிப்படையில் மீன்பிடி தொழிலில் முதலீடு செய்பவர்கள்) மற்றும் தனியார் பணம் கடன் வழங்குபவர்கள் . இந்த முறைசாரா ஒப்பந்தங்கள் கடன் பொறிகளாக மாறும் என்று ஆய்வு கூறுகிறது.

"மீனவர்கள் வள அடிப்பையில் ஏழ்மையானவர்கள், அவர்களால் பிரீமியம் செலுத்த முடியாது. அவர்கள் எப்படி பெரிய கடன்களை அடைப்பார்கள்?" என்று, சி.எம்.எப்.ஆர்.ஐ. இன் ஷினோஜ் கூறினார்.

புதுமையான திட்டங்கள் தேவை

பேரிடர் மேலாண்மை விதிகளின் கீழ் வழங்கப்படும் இழப்பீடு, மிகவும் பெயரளவில் உள்ளது. ரூ .5 லட்சம் அல்லது ரூ.10 லட்சம் இழப்பு ஏற்பட்டால், இழப்பீடு மிகக் குறைந்த தொகை ரூ.15,000 - ரூ.20,000," என்று, மகாராஷ்டிராவின் கொங்கன் பகுதியில் அமைந்துள்ள ஒரு மீனவர் கூட்டமைப்பான மகாராஷ்டிரா மச்சிமர் கிருதி சமிதியின் செயலாளர் கிரண் கோலி கூறினார்.

தற்போதுள்ள காப்பீட்டுத் திட்டங்கள், காலநிலை நெருக்கடியை சமாளிக்க போதுமான புதுமையானவை அல்ல என்று, சிஎஃப்எம்ஆர்ஐ ஷினோஜ் கூறினார்.

ஆர்வலர் கோலி, மகாராஷ்டிராவின் தொழில்துறை அமைச்சர் சுபாஷ் தேசாய் மற்றும் நிவாரண மற்றும் மறுவாழ்வு அமைச்சர் விஜய் வடெட்டிவாரை சந்தித்தார், எதிர்பாராத சூழ்நிலைகளால் ஏற்படும் இழப்பு மற்றும் சேதத்தை ஈடுகட்டும் பயிர் காப்பீடு திட்டம் போன்ற புதுமையான திட்டங்களின் கீழ் மீனவர்களுக்கு காப்பீடு செய்ய வேண்டும் என்று வலியுறுத்தினார். "இதற்கு அவர்கள் ஒப்புக்கொண்டனர், ஆனால் இன்னும் நடவடிக்கை இல்லை," என்று அவர் கூறினார்.

கடந்த 2004 ஆம் ஆண்டு சென்னையில் ஏற்பட்ட சுனாமிக்கு பின்னர், சுகாதாரம், கல்வி மற்றும் பெண்கள் அதிகாரம் தொடர்பான பஜாஜ் அலையன்ஸ் ஜெனரல் இன்சூரன்ஸ், கேர் இந்தியாவின் உதவியுடன், மீன்பிடி உபகரணங்கள், பாதுகாப்பு வலைகள், படகுகளுக்கு ஓரளவு சேதம் போன்ற சேதமடைந்த சொத்துக்களுக்கு கடலோர சமூகங்களுக்கான பேரிடர் ஆபத்து காப்பீட்டு தயாரிப்பை உருவாக்கியது. பல மீனவர்கள் இந்தத் திட்டங்களைப் பயன்படுத்தியதாக சிஎம்எஃப்ஆர்ஐயின் ஷினோஜ் கூறினார். "ஆனால் 2008 ஆம் ஆண்டில், நிஷா புயலுக்குப் பிறகு, பெரும் சேதம் ஏற்பட்டது மற்றும் நிறுவனம் அனைத்து இழப்பீடுகளையும் செலுத்த வேண்டியிருந்தது, இதன் விளைவாக நிதி இழப்பைச் சந்தித்தது. இந்த திட்டம் தற்போது செயல்படவில்லை" என்றார்.

உபகரணங்கள் மற்றும் கைவினை போன்ற மீன்பிடி சொத்துகளுக்கு காப்பீட்டுத் திட்டத்தை வழங்கும் தேசிய மீன்வளக் கொள்கை வரைவை, அரசாங்கம் 2020 இல் அறிமுகப்படுத்தியது. "இயற்கை பேரிடர்கள் மற்றும் அவர்களின் கட்டுப்பாட்டிற்கு அப்பாற்பட்ட பிற செயல்களின் போது ஏற்படும் இழப்புகளை ஈடுசெய்ய, மீனவர்களுக்கு உதவுவதே இதன் நோக்கம்", மற்றும் பங்குதாரர்களிடம் இருந்து கருத்துகள் வரவேற்கப்பட்டன. ஆனால் கொள்கை இறுதி செய்யப்படவில்லை, அல்லது புதுப்பிக்கப்பட்டது, இன்னும் வெளியிடப்படவில்லை.