இந்திய குடிமக்களில் பாதிப்பேரின் அதிகாரப்பூர்வ தரவுகள் விடுபடுவது எப்படி

உலகளாவிய பாலின இடைவெளி குறியீட்டு-2020 இல் இந்தியா 153 நாடுகளில் 112வது இடத்தில் உள்ளது, இது 2018 ஆண்டுடன் ஒப்பிட்டால், நான்கு இடங்கள் வீழ்ச்சியாகும். பொருளாதார பங்கேற்பு, வாய்ப்பு மற்றும் சுகாதாரம் மற்றும் உயிர்வாழும் துணை குறியீடுகளில் இந்தியா மோசமாக செயல்படும் ஐந்து நாடுகளில் ஒன்றாகும். தரவுகளில் உள்ள இடைவெளிகள், தற்போதுள்ள பாலின ஏற்றத்தாழ்வுகளைக் கண்டறிவதிலும், இடைவெளியை சரி செய்வதற்கான கொள்கைகளை வகுப்பதிலும் அதிகரித்த சிரமத்தைக் குறிக்கின்றன.

இந்தியாவில், தரவுகளின் இடைவெளிகள் மூன்று முக்கிய காரணங்களால் ஏற்படுவதை எங்கள் பகுப்பாய்வு கண்டறிந்துள்ளது: (i) பெரும்பாலான ஆய்வுகள் வீட்டு அளவிலான தரவைப் பார்க்கின்றன, ஆனால் பெண்களின் சொத்து உரிமையையோ அல்லது வீட்டிலுள்ள அடிப்படை வசதிகளுக்கான அணுகலையோ மதிப்பிடவில்லை - சொத்து உரிமை என்பது ஒரு வீட்டிற்குள் ஒரு நபர் வைத்திருக்கும் அதிகாரத்தின் குறிகாட்டியாகும்; (ii) பல முக்கியமான தரவு புள்ளிகள் பாலினத்தால் பிரிக்கப்படாதவை மற்றும் அவ்வப்போது இல்லை; (iii) வரையறைகள், குறிப்பாக பெண்களுக்கு எதிரான குற்றங்களில் தெளிவாக இல்லை மற்றும் குறைவாக மதிப்பிடுவதும் வழக்கமாக உள்ளது.

பாலின தரவுகளில் இடைவெளி என்பது, உலகம் முழுவதும் இருப்பதாக 2018 ஐ.நா. பெண்கள் அறிக்கை கூறுகிறது. 126 நாடுகளில் மூன்றில் ஒரு பங்கு (37%) மட்டுமே பாலின புள்ளிவிவரங்களுக்கான ஒருங்கிணைப்புக் குழுவைக் கொண்டிருந்ததை, 2012 மதிப்பாய்வு கண்டறிந்தது; 13% நாடுகளில் மட்டுமே பாலின புள்ளிவிவரங்களுக்கான வழக்கமான பிரத்யேக பட்ஜெட் இருந்தது. கருத்துக்கள் மற்றும் வழிமுறைகளில் பாலின சார்புகளை அகற்றுவதற்காக தரவு இடைவெளிகளை செருக வேண்டியதன் அவசியத்தை சுருக்கமாக வலியுறுத்தியது, மேலும் கொள்கைகள் மற்றும் தலையீடுகள் "பெண்கள் மற்றும் சிறுமிகளின் வாழ்ந்த யதார்த்தத்தை" பூர்த்தி செய்வதை உறுதிசெய்கின்றன.

பிரிக்கப்பட்ட தரவு பகுதி, பாலினம் மற்றும் இனம் போன்ற விரிவான துணை வகைகளாக வகைபடுத்தப்பட்டுள்ளது, மேலும் ஒருங்கிணைந்த தரவுகளால் முடியாத பல்வேறு துணை வகைகளுக்கு இடையிலான ஏற்றத்தாழ்வுகளை வெளிப்படுத்த முடியும். பாலின-பிரிக்கப்படாத தரவு இல்லாத முக்கிய களங்களின் விரிவான பகுப்பாய்வு இங்கே:

வேலைகள் மற்றும் வாழ்வாதாரங்கள்

இந்தியாவின் மக்கள்தொகையில் கிட்டத்தட்ட பாதி பேர் (48%) பெண்கள்; ஆனால் தொழிலாளர் தொகுப்பில் அவர்களின் பங்களிப்பு மிகவும் குறைவாகவே உள்ளது, அத்துடன் குறைந்து வருகிறது. 15 வயதிற்கு மேற்பட்ட பெண்களில் 20.3% மட்டுமே பணியாளர்களாக உள்ளனர் - இது 2005ஆம் ஆண்டில் 31.7% ஆக இருந்ததுடன் ஒப்பிட்டால், கிட்டத்தட்ட 12 சதவீத புள்ளிகள் சரிவாகும்.

இந்தியாவின் வேலைவாய்ப்பு மற்றும் கடன் அணுகல் பற்றிய தரவு, பெண்களின் பணிச்சூழல், ஊதிய பாகுபாடு, பெண்கள் பெறும் கடன் வகை மற்றும் அதன் வட்டி விகிதங்கள் குறித்த முக்கியமான தரவு புள்ளிகளை இழப்பதாக, இனிஷியேடிவ் பார் வாட் ஒர்க்ஸ் டு அட்வான்ஸ் விமன் அண்ட் கேர்ள்ஸ் இன் தி எகனாமி (IWWAGE) 2019 ஆய்வு தெரிவிக்கிறது.

தேசிய புள்ளிவிவர அலுவலகம் (என்எஸ்ஓ) வேலைவாய்ப்பு குறித்த நூற்றுக்கணக்கான பக்க தரவுகளை வெளியிடுகிறது, ஆண்டுதோறும் தொழிலாளர் திறன் கணக்கெடுப்புகளின் வடிவத்தில் தொழிலாளர் சக்தி மற்றும் செயலில் பங்கேற்பு மற்றும் நகர்ப்புறங்களுக்கான காலாண்டு அறிக்கைகள், அறிக்கைகள் பெண்களின் ஊதியம் பெறாத உழைப்பை போதுமான அளவு கணக்கில் எடுத்துக்கொள்வதில்லை.

இந்த சிக்கலை முன்னிலைப்படுத்தும் காலநேர பயன்பாட்டு ஆய்வுகள் - ஒவ்வொரு வீட்டு உறுப்பினரும் எவ்வாறு நேரத்தை செலவிடுகிறார்கள் என்பதற்கான தரவுகளை சேகரிப்பதன் மூலம் - குறைவாகவே நிகழ்கின்றன.

கடந்த 1998-99 ஆம் ஆண்டில் ஆறு மாநில கணக்கெடுப்பு நடந்து, 20 வருட இடைவெளிக்குப் பிறகு, 2019 ஆம் ஆண்டில் தேசிய புள்ளிவிவர அலுவலகம் இதேபோன்ற கணக்கெடுப்பை நடத்தியது. வீட்டு உறுப்பினர்களுக்காக தொகை செலுத்தப்படாத வீட்டு சேவைகளுக்கு பெண்கள் ஒவ்வொரு நாளும் கிட்டத்தட்ட ஐந்து மணிநேரம் எவ்வாறு செலவிடுகிறார்கள், இதுவே ஆண்கள் செலவிடுவது 98 நிமிடங்கள்தான் என்பதை இந்த ஆய்வு காட்டுகிறது.

இருப்பினும், தொடர்புடைய தரவுகளின் இருப்பு, புதிரின் ஒரு பகுதி மட்டுமே; குறிப்பிட்ட கால இடைவெளியில் (அல்லது சரியான நேர இடைவெளியில் தரவை சேகரித்தல் மற்றும் பெறுதல்) மற்றொன்று ஆகும். தொடர்புடைய தரவு, அதே வடிவத்தில், காலப்போக்கில் முன்னேற்றத்தை மதிப்பிடுவதற்கு அவ்வப்போது கிடைக்க வேண்டும். எடுத்துக்காட்டாக, 1999 மற்றும் 2019ஆம் ஆண்டுக்கு இடைப்பட்ட 20 ஆண்டுகளில் பெண்கள் அதிக நேரம் செலவிட்டிருக்கிறார்களா என்பதை பகுப்பாய்வு செய்வது கடினம், ஏனெனில், 2019 கணக்கெடுப்பு இந்தியா முழுவதையும் உள்ளடக்கியது, 1999ஆம் ஆண்டு கணக்கெடுப்பில் ஆறு மாநிலங்களுக்கான தரவு மட்டுமே உள்ளது.

பாலினம் குறித்த தரவுகளின் குறிப்பிட்ட கால பற்றாக்குறை, உலகம் முழுவதும் கவலைக்குரிய ஒன்றாக உள்ளது. கிடைக்கக்கூடிய தரவுகளில் 23% மட்டுமே 2010 அல்லது அதற்குப் பிறகும்; அத்துடன் இரண்டு அல்லது அதற்கு மேற்பட்ட புள்ளிகளுக்கு 16% மட்டுமே கிடைக்கிறது என்று ஐ.நா. பெண்கள் அமைப்பின் அறிக்கை கூறியது.

"ஊதியம் பெறாத வேலையில் பாலின புள்ளிவிவரங்களானது, ஊதிய வேலைகளில் பெண்களின் பங்களிப்பை விரிவாக்குவதற்கான கொள்கைகளை உருவாக்குவதிலும் கண்காணிப்பதிலும் முக்கிய பங்கு வகிக்கின்றன," என்று, IWWAGE இன் மூத்த ஆராய்ச்சியாளரும் பாலின தரவு இடைவெளிகளைப் பற்றிய ஆய்வின் இணை ஆசிரியருமான ருச்சிகா சவுத்ரி கூறினார். "அத்தகைய தரவு இல்லாதது வேலைவாய்ப்பு மற்றும் பொருளாதாரம் [ஊதியம் பெறாத வீட்டு பராமரிப்புப் பணிகளின் பொருளாதாரம்] ஆகியவற்றில் பயனற்ற கொள்கைகளை உருவாக்க வழிவகுக்கும்" என்றார்.

தொழிலாளர் தொகுப்பில் பெண்களின் குறைந்த பங்களிப்பு, சமூக மற்றும் பொருளாதார விதிமுறைகள் பணியமர்த்தல் நடைமுறைகள், பணி நிலைமைகள் மற்றும் பெண்களுக்கான சமூக பாதுகாப்பு சலுகைகளை எவ்வாறு பாதிக்கின்றன என்பதையும் பகுப்பாய்வு செய்ய வேண்டும்.

எவ்வாறாயினும், பணியமர்த்துதல் மற்றும் ஊதியத்தில் பெண்கள் எதிர்கொள்ளும் பாகுபாடு பற்றிய நுண்ணறிவுகளை வழங்கக்கூடிய தேவை, பக்க காரணிகளை பகுப்பாய்வு செய்ய, தற்போது கிடைக்கக்கூடிய தரவு அனுமதிக்காது.

"குறைந்த அளவிலான தொழிலாளர் பங்களிப்புக்கான காரணங்களை அர்த்தமுள்ளதாக புரிந்து கொள்வதற்கு, தேவை மற்றும் விநியோகத் தரப்பில் நமக்கு ஆதாரங்கள் தேவை," என்று, பொருளாதார பேராசிரியரும், அசோகா பல்கலைக்கழகத்தின் பொருளாதாரத்தரவு மற்றும் பகுப்பாய்வு மையத்தின் நிறுவன இயக்குநருமான அஸ்வினி தேஷ்பாண்டே இந்தியா ஸ்பெண்டிடம் தெரிவித்தார். பெண்கள் ஏன் வேலை செய்யவில்லை அல்லது அவர்கள் ஏன் தொழிலாளர் திறனை விட்டு வெளியேறுகிறார்கள் என்ற கேள்விகளுக்கு வினியோக தரப்பு காரணிகளின் தரவு பதிலளிக்கிறது என்ற தேஷ்பாண்டே, "ஆனால் முதலாளிகள் பெண்களுக்கு பாகுபாடு காட்டுகிறார்களா, திறமை பொருந்தவில்லையா, பெண்களின் நிபுணத்துவம், திறன் மற்றும் கல்வி ஆகியவற்றைப் பயன்படுத்தக்கூடிய போதுமான வேலைகள் இல்லையா, போன்ற கேள்விகளுக்கு பதிலளிக்க, தேவை பக்க காரணிகளின் தரவு அவசியம்" என்றார்.

"கண்ணியமான" பணிச்சூழல்களில் எத்தனை பெண்கள் வேலை செய்கிறார்கள், பணிக்கு செல்லும் பெண்களின் விடுதிகள் மற்றும் குழந்தை வளர்ப்பு மையங்களை அணுகுவது, மற்றும் பாலூட்டும் தாய்மார்கள் எத்தனை வேலை நேரங்களில் உணவு இடைவேளை பெறுகின்றனர் என்பது பற்றிய தகவல்கள் கிடைக்கவில்லை என்று, IWWAGE ஆய்வில் கண்டறியப்பட்டுள்ளது. கர்ப்பம், குழந்தை பராமரிப்பு, முதியோர் பராமரிப்பு, குடும்ப ஆதரவின்மை, மற்றும் ஆதரவற்ற பணிச்சூழல் ஆகியன, தொழிலாளர் தொகுப்பை விட்டு இந்திய பெண்கள் வெளியேற முக்கிய காரணங்கள் என்று ஆகஸ்ட் 2018 இல் நாங்கள் தெரிவித்தோம். எனவே, பாதுகாப்பான பணி நிலைமைகள் மற்றும் குழந்தை பராமரிப்பு வசதிகளுக்கான அணுகல் குறித்த வலுவான தரவு இந்த சிக்கல்களை தீர்க்கக்கூடிய கொள்கைகளை உருவாக்க உதவும்.

தொழில்களின் வருடாந்திர கணக்கெடுப்பு, பணிபுரியும் தொழிலாளர்களுக்கு பாலின-பிரிக்கப்படாத தரவை வழங்கும் அதே வேளையில், ஒப்பந்தத் தொழிலாளர்களுக்கு இதுபோன்ற தரவு எதுவும் இல்லை. மேலும், ஊதியத்தில் பாலின-பிரிக்கப்பட்ட தரவு எதுவும் கிடைக்கவில்லை. இதேபோல், முறைசாரா துறையில் அதிக எண்ணிக்கையிலான சுயதொழில் செய்யும் பெண் தொழிலாளர்கள் பற்றிய தரவும் இல்லை. சமூக பாதுகாப்பு சலுகைகள், வேலை ஒப்பந்தங்கள் மற்றும் ஊதிய விடுப்பு ஆகியவற்றிற்கு தகுதியற்ற பெண் தொழிலாளர்கள் பற்றிய தரவுகளை தேசிய புள்ளிவிவர அலுவலகத்தின் வருடாந்திர அறிக்கைகள் சேகரிக்கும் அதேவேளையில், சமூக பாதுகாப்பு சலுகைகள் தேவைப்படும் பெண்களின் விகிதத்தையும் அவற்றைப் பெறுபவர்களையும் அவர்கள் அடையாளம் காணவில்லை.

உலகின் மிகப்பெரிய வேலைவாய்ப்பு திட்டமான மகாத்மா காந்தி தேசிய கிராமப்புற வேலைவாய்ப்பு உத்தரவாத திட்டத்தின் (MGNREGA) தகவல் பலகை, பாலியல்-பிரிக்கப்படாத தரவை மொத்த நபர் நாட்களுக்கு மட்டுமே வழங்குகிறது. ஆதரவு வசதிகள், ஊதியங்கள் மற்றும் வேலை காலம் குறித்த தகவல்கள், பாலினம் சார்ந்து கிடைக்கவில்லை என்று, IWWAGE அறிக்கை தெரிவிக்கிறது.

தொழிலாளர் சந்தையில் பெண் தொழிலாளர்கள் மிகவும் பின்தங்கிய நிலையில் உள்ளனர் - அவர்கள் பெருமளவில் குறைந்த திறனுள்ள முறைசாரா தொழிலாளர்களாக குறைந்த உற்பத்தித்திறன், குறைந்த ஊதியம் பெறும் வேலையில் ஈடுபட்டுள்ளனர் என்று இந்தியா ஸ்பெண்ட் மார்ச் 2018 கட்டுரை தெரிவித்துள்ளது. அரசின் முதன்மை திட்டமான திறன் இந்தியா (Skill India) திட்டத்தின் கீழ் பயிற்சியளிக்கப்பட்ட பயனாளிகளின் எண்ணிக்கை மற்றும் பயிற்சி அமர்வுகள் குறித்த பாலின ரீதியாக பிரிக்கப்படாத தரவை வழங்கும் அதே வேளை, இது வழங்கப்பட்ட பயிற்சி வகைகளின் விவரங்களை வழங்காது என்று, IWWAGE அறிக்கை காட்டுகிறது. அத்தகைய தரவு கிடைக்கப்பெற்றால், பெண் தொழிலாளர்களிடையே அவர்களின் வேலை வாய்ப்புகளை குறைத்துக்கொண்டிருக்கும் திறன் பொருந்தாததா என்பதை புரிந்துகொள்ள உதவக்கூடும், பின்னர் இந்த பொருத்தமின்மையை சரிசெய்ய வடிவமைப்பு திட்டங்களுக்கு உதவும்.

தொழிலாளர் சந்தை பங்களிப்பை பாதிக்கும் பாலின விதிமுறைகள் மற்றும் உணர்வுகள் பற்றிய தகவல்களை சேகரிப்பளவு கணக்கெடுப்புகளுக்கு புதியது மற்றும் அதிகாரபூர்வ தரவு ஆதாரங்கள் இன்னும் இதில் சேர்க்கப்படவில்லை என்று IWWAGE அறிக்கை தெரிவித்துள்ளது.

தரவுகளை சேகரிப்பதில் தற்போதைய 'நிலையான' முறை பெண்கள் தங்கள் வாழ்க்கையின் வெவ்வேறு கட்டங்களில் எதிர்கொள்ளும் வெவ்வேறு தடைகளை கடப்பது பொருத்தமற்றது என்று IWWAGE அறிக்கை தெரிவித்துள்ளது. வெவ்வேறு வயதிற்குட்பட்ட பெண்கள், தங்கள் வாழ்க்கையின் வெவ்வேறு கட்டங்களில், திருமணமானவர்கள், தனியே இருப்பவர்கள், விவாகரத்து பெற்ற பெண்கள் அல்லது பெற்றோருடன் வசிக்கும் பெண் என வெவ்வேறு பிரச்சினைகள் உள்ளன.

பாதுகாப்பு மற்றும் பணி உத்தரவாதம், ஊதிய இடைவெளிகள் மற்றும் குழந்தை பராமரிப்பு கொள்கைகள் ஆகியன, ஒவ்வொரு வகை பெண்ணையும் வித்தியாசமாக பாதிக்கின்றன. தரவு சேகரிப்பின் தற்போதைய அமைப்பு இந்த பல சிக்கல்களைப் பிடிக்கத் தவறிவிட்டது மற்றும் பாலின-பார்வையின்மை கொள்கைகளால் விளைகிறது என்று சவுத்ரி கூறினார்.

கடன் மற்றும் சொத்து உரிமைக்கான அணுகல்

வேலைவாய்ப்புக்கு கூடுதலாக, எளிதான கடனுக்கான அணுகல் பெண்களுக்கு பொருளாதார வாய்ப்புகளைத் திறக்கும். தேசிய ஊரக வாழ்வாதாரத் திட்டம் (NRLM) - இது, சுய உதவிக்குழுக்களுக்கு எளிதான நிதியளிப்பதற்கான அரசின் திட்டம் - வீட்டு வருமானத்திற்கு 19% ஆகவும், சேமிப்புக்கு 28% ஆகவும் அதிகரித்துள்ளது என்று அக்டோபரில் தெரிவித்தோம். இத்திட்டத்தின் கீழ் இயங்கும் கிராமப்புற மேம்பாட்டு அமைச்சகம், திட்டத்தின் முன்னேற்றம் குறித்த வருடாந்திர மாநில வாரியான தரவை வழங்கும் அதே வேளையில், உறுப்பினர் வாரியாக கடன் அணுகல் மற்றும் பயன்பாடு மற்றும் அவற்றின் பங்கேற்பு மற்றும் செயல்திறன் குறித்த பாலின-பிரிக்கப்படாத தரவை இது வழங்காது. இது திட்டத்தின் மூலம் எத்தனை பெண்கள் பயனடைகிறார்கள் என்பதை பகுப்பாய்வு செய்வது கடினம்.

பிரதம மந்திரி முத்ரா யோஜனா (PMMY) -- சிறு மற்றும் நுண் நிறுவனங்களுக்கு ரூ.10 லட்சம் வரை கடன்களை வழங்கும் அரசின் முதன்மை திட்டம் -- நன்மை பெறும் பெண் தொழில்முனைவோரின் எண்ணிக்கை குறித்த தரவை மட்டுமே வழங்குகிறது. அதன் ஒவ்வொரு மூன்று தொகை அடிப்படையிலான வகைகளின் கீழ் எத்தனை பெண்கள் கடனைப் பெற்றுள்ளனர் என்பது குறித்த விரிவான தகவல்களை இது தரவில்லை என்று, IWWAGE அறிக்கை கண்டறிந்துள்ளது. பெண் தொழில்முனைவோருக்கு குறைந்த கட்டணத்தில் வங்கிகள் கடன்களை வழங்கக்கூடும் என்று திட்ட வழிகாட்டுதல்கள் குறிப்பிடுகின்றன, இது குறித்த தரவு எதுவும் கிடைக்கவில்லை.

பாலினம் பிரிக்கப்படாத தரவு புள்ளிகள், வரையறைகள் மற்றும் வகைப்பாடுகளில் பாலின சார்பு, மக்கள்தொகை கணக்கெடுப்புகளுக்கான மாதிரி தேர்வு மற்றும் கேள்விகள் கேட்கப்படும் மற்றும் தரவு சேகரிக்கும் முறை ஆகியவை தரவு மூலத்தின் வலுவான தன்மையை பாதிக்கின்றன என்று ஐ.நா. பெண்கள் அமைப்பின் சுருக்கமாக தெரிவித்தனர்.

தொழிலாளர் பங்களிப்பின் வீழ்ச்சி பெண்களின் பணி எவ்வாறு வகைப்படுத்தப்படுகிறது என்பதையும் பொறுத்தது. அரசின் தேசிய மாதிரி ஆய்வுகள் 2004-05 மற்றும் 2011-12 க்கு இடையில் பங்கேற்பதில் கிட்டத்தட்ட 25% சரிவைக் காட்டுகின்றன என்று, இந்திய மனித மேம்பாட்டு ஆய்வு (IHDS) இதே காலகட்டத்தில் 5% சரிவை பதிவு செய்கிறது. ஐ.ஹெச்.டி.எஸ் நடத்திய தேசிய பயன்பாட்டு பொருளாதார கவுன்சில் (NCAER) கூறுகிறது, ஏனெனில் மாதிரி கணக்கெடுப்புகளின் கேள்விகள் பெண்களின் குடும்ப அடிப்படையிலான பணிகள் குறித்த தரவைப் பெறுவதைத் தவறவிடுகின்றன. கணக்கெடுப்பில் பதில் அளித்தவர்கள் மற்றும் நேர்காணல் செய்யப்பட்டவர்கள், பெண் விவசாயிகள் அல்லது சிறு தொழில் புரியும் பெண்களை வீட்டு உற்பத்தியாளராக தவறாக வகைப்படுத்தலாம், அதே நேரத்தில் இதே போன்ற தொழில்களில் உள்ள ஆண்களின் வேலைவாய்ப்பாக கருதப்படுகிறது.

இந்தியாவில் பெண் விவசாயிகளின் தற்கொலை எண்ணிக்கை குறைவாக உள்ளது; காரணம், அந்த எண்ணிக்கை இல்லத்தரசிகள் தற்கொலை என்று வகைப்படுத்தப்படலாம். ஏனெனில் பொதுவாக இந்த சமூகங்கள் பெரும்பாலும் பெண்களை விவசாயிகளாக ஒப்புக் கொள்வதில்லை என்று இந்தியா ஸ்பெண்ட் ஆகஸ்ட் 2015 கட்டுரை தெரிவித்தது.

சொத்து உரிமையின் தரவிலும் முரண்பாடுகள் காணப்படுகின்றன. இந்த தகவல்கள் வீட்டு அளவில் மட்டுமே கிடைக்கின்றன, எனவே, வீட்டு பெண்கள் எந்த சொத்துக்களை வைத்திருக்கிறார்கள் என்பது குறித்த தரவு எதுவும் இல்லை என்று IWWAGE அறிக்கை காட்டுகிறது. "கிடைக்கக்கூடிய பெரும்பாலான புள்ளிவிவரங்கள் பிரிக்கப்படுவதற்கு போதுமானதாக இல்லை" என்று சவுத்ரி கூறினார். "பாலின பரிமாணங்களை வெளிப்படுத்த வீட்டுத் தரவை எப்போதும் தனிநபர்களாகப் பிரிக்க முடியாது" என்றார்.

உதாரணமாக, வேளாண் கணக்கெடுப்பு மாநில நிலவருவாய் கணக்கெடுப்புகளின் தரவை ஒருங்கிணைக்கிறது, அவை வீட்டளவில் செயல்பாட்டு இருப்புக்களை முதன்மை அலகு என்று கருதுகின்றன. எனவே, வீட்டின்ன் உரிமையை வைத்திருப்பவர்களுக்கு பாலின-பிரிக்கப்படாத தரவு எதுவும் இல்லை. இந்தியாவில், நில உரிமை என்பது ஒரு விவசாயியின் வரையறைக்கு ஒருங்கிணைந்ததாகும், ஆனால் பல பெண்கள் தாங்கள் வேலை செய்யும் நிலத்தை சொந்தமாகக் கொண்டிருக்கவில்லை. இது அரசு சலுகைகளை அணுகுவதில் இருந்து அவர்களை அந்நியப்படுத்துகிறது என்று, நாங்கள் செப்டம்பர் 2019 இல் கட்டுரை வெளியிட்டிருந்தோம்.

சுகாதாரம், சுகாதாரம் மற்றும் கல்வி

உலகளவில் நீர் தொடர்பான வேலைகளில் 70% க்கும் மேற்பட்ட அதன் நிர்வாகத்திற்கும் பெண்கள் பொறுப்பு; பெண்கள் மற்றும் சிறுமிகளின் உடல்நலம் மற்றும் நல்வாழ்விற்கு சுத்தமான நீர், போதுமான சுகாதாரம் மற்றும் சுகாதார வசதிகள் அத்தியாவசியம் ஆகும்.

மக்கள்தொகை கணக்கெடுப்பு மற்றும் தேசிய புள்ளிவிவர அலுவலகத்தின் புள்ளி விவரங்கள் இரண்டும், நீர் கிடைப்பது மற்றும் தண்ணீரைப் பெறுவதற்கு பயணித்த தூரம் பற்றிய தரவுகளை வழங்கும் அதே வேளையில், நீரின் தரம், தண்ணீர் கிடைக்காத நாட்கள் அல்லது பாதுகாப்பற்ற தண்ணீருக்கான தனிப்பட்ட அணுகல் பற்றிய தகவல்கள் கிடைக்கவில்லை. இந்தியாவில் 69,258 "நீர்-தரத்தால் பாதிக்கப்பட்ட வாழ்விடங்கள்" உள்ளன, இது கிட்டத்தட்ட 4.6 கோடி மக்களை பாதிக்கிறது என்று, நவம்பர் 2018 இல் நாங்கள் கட்டுரை வெளியிட்டிருந்தோம். இருப்பினும், ஒரு வீட்டுக்குள் சுகாதார மற்றும் சுகாதார பிரச்சினைகளை தீர்க்க உதவக்கூடிய இந்த தகவல்கள், வீட்டளவில் கிடைக்கவில்லை.

தேசிய புள்ளிவிவர அலுவலகம், தேசிய குடும்ப சுகாதார ஆய்வு மற்றும் மக்கள் தொகை கணக்கெடுப்பு விவரங்கள், ஒரு வீட்டிற்கு ஒரு கழிவறைக்கு (சொந்தமான / பகிரப்பட்ட) அணுகல் உள்ளதா என்பது பற்றிய தகவல்களை சேகரிக்கிறது, ஆனால் இந்த ஆய்வுகள் எதுவும் பெண்கள் கழிவறை வசதியைப் பயன்படுத்துகிறார்களா அல்லது வாழ்நாள் முழுவதும் அவர்களால் அதை அணுக முடியுமா என்பது குறித்த எந்த தகவலும் இல்லை. பணியிடத்தில் கழிப்பறை வசதிகள் எவ்வாறு உள்ளன என்பது குறித்து எந்த தகவலும் கிடைக்கவில்லை.

வீடுகளில் பராமரிப்பு பணி செய்வோர் குறித்த போதுமான தரவுகளும் இல்லை. வீட்டிலேயே பராமரிப்பது பொது சுகாதார அமைப்புக்கு நேரத்தையும் செலவையும் மிச்சப்படுத்த உதவுகிறது. எனவே, பல மாத பராமரிப்பு ஏற்பாடுகள், அரசு வழங்கிய ஆதரவு மற்றும் ஆண்களுக்கும் பெண்களுக்கும் இடையிலான பராமரிப்பு சுமையை விநியோகிக்க பொருத்தமான குறிகாட்டிகள் தேவை என்று அறிக்கையில் தெரிவிக்கப்பட்டுள்ளது.

மாதிரி பதிவு அமைப்பு (SRS) போன்ற சுகாதார குறிகாட்டிகளில் தேசிய குடும்ப சுகாதார ஆய்வு மற்றும் பிற அதிகாரபூர்வ தரவு ஆதாரங்கள் குழந்தை மற்றும் தாய்வழி ஆரோக்கியம் குறித்த வலுவான தரவை வழங்கும் அதே வேளையில், இளம் பருவ பெண்கள் குறித்த தரவு குறைவு. 10 முதல் 19 வயதிற்குட்பட்ட நாட்டின் 23.65 கோடி குழந்தைகளுக்கு இளம் பருவ ஆரோக்கியத்தில் இந்தியா கவனம் செலுத்தினால், அது நாட்டின் வளர்ச்சிக்கும் முன்னேற்றத்திற்கும் பயனளிக்கும் வகையில் ஆரோக்கியமான மற்றும் அதிக உற்பத்தி செய்யும் உழைக்கும் மக்களை உருவாக்கும் என்று ஆகஸ்ட் 2019 இல் எங்களது கட்டுரை தெரிவித்திருந்தது.

சுகாதார விளைவுகளை மேம்படுத்துவதில் கல்வியும் முக்கிய பங்கு வகிக்கிறது மற்றும் குறைவான பள்ளி இடை நிற்றல் என்பது, குறைவான இள வயது திருமணத்தை குறிக்கும், அது குறைந்த சிசு மரணத்தையும் குறிக்கும். கல்விக்கான ஒருங்கிணைந்த மாவட்ட தகவல் அமைப்பு (U-DISE) சேர்க்கை மற்றும் வருகைப்பதிவு குறித்த தரவுகளை சேகரிக்கும் அதே வேளையில், பள்ளிகளில் பெண்கள் மற்றும் சிறுவர்களின் சராசரி தினசரி வருகைப்பதிவை- குறைந்த வருகையுடன் சிறுமிகளைக் கண்காணிக்க உதவும் இந்த தரவை பார்க்கவில்லை

மேலும், இனம், மதம், இருப்பிடம் அல்லது இயலாமை காரணமாக சமூக ரீதியாக விலக்கப்பட்ட பெண்கள் பற்றிய தகவல்கள் மிக முக்கியமானவை; எனவே பெண்கள் ஏன் வெளியேறுகிறார்கள் என்பதைப் புரிந்து கொள்ள வேண்டும், ஏனெனில் இந்த பெண்கள் பலவிதமான பாகுபாடு மற்றும் விலக்குகளை சந்திக்க நேரிடும் என்று IWWAGE அறிக்கை கூறியுள்ளது.

பெண்களுக்கு எதிரான குற்றங்கள் மீதான அறிக்கை குறைவு

விடுபட்ட, காணாமல் போன தரவு புள்ளிகள் மற்றும் பாலின-பிரிக்கப்படாத தரவுகளின் பற்றாக்குறை ஆகியவற்றுடன், பெண்களுக்கு எதிரான குற்றங்கள் குறித்த தரவுகளுக்கு வரும்போது, குறைத்து மதிப்பிடுவது கவலை அளிக்கிறது.

நேஷனல் க்ரைம் ரெக்கார்ட்ஸ் பீரோவின் (NCRB) கிரைம் இன் இந்தியா அறிக்கையானது, இந்தியா முழுவதற்குமான குற்றங்களின் விரிவான தரவு மூலமாகும். இந்த அறிக்கை நிர்வாக ஆதாரங்கள் அல்லது காவல் துறை பதிவுகளின் அடிப்படையில் தொகுக்கப்பட்டுள்ளது மற்றும் பெண்களுக்கு எதிரான பல்வேறு வகையான குற்றங்கள் குறித்த விரிவான தரவுகளைக் கொண்டுள்ளது.

இருப்பினும், இந்தியாவில் பெண்களுக்கு எதிரான குற்றங்கள் கணிசமாக குறைவாகவே பதிவாகி இருக்கின்றன, இது இந்த குற்றங்களை தீர்ப்பதில் ஒரு அடிப்படையான, பொதுவான தடையாகும் என்று, ஆகஸ்ட் 2019 இல் எங்களது கட்டுரை தெரிவித்தது. இந்த குற்றங்களை குறைத்து மதிப்பிடுவது என்.சி.ஆர்.பியின் தரவு எவ்வாறு உள்ளது என்பதற்கான கேள்விக்குறியை வைக்கிறது.

நேஷனல் க்ரைம் ரெக்கார்ட்ஸ் பீரோவின் அறிக்கை நாட்டில் பெண்களுக்கு எதிரான குற்றங்களின் சரியான அளவுகள் மற்றும் பரவலான தன்மையை வெளிப்படுத்தவில்லை என்று, குற்ற புள்ளிவிவரங்களை மறுஆய்வு செய்வதற்காக புள்ளி விவரங்கள் மற்றும் திட்ட அமலாக்கத்துறை அமைச்சகம் (MOSPI) அமைத்த குழுவின் 2011 அறிக்கை தெரிவித்தது.

இந்த குற்றங்களை பெண்கள் புகார் அளிப்பதைத் தடுக்கும் காரணிகளை புரிந்து கொள்வது பெண்களுக்கு எதிரான குற்றங்களை குறைவாக மதிப்பிடுவது முக்கியம். டெல்லியில் 13 பாலியல் துன்புறுத்தல் வழக்குகளில் ஒன்று; மும்பையில் ஒன்பது பேரில் ஒருவர் மட்டுமே போலீசில் புகார் அளிக்கின்றனர் என்று, காமன்வெத் மனித உரிமைகள் அமைப்பு (CHRI) 2015 ஆம் ஆண்டில் 5,000 வீடுகளில் நடத்திய ஆய்வில் கண்டறியப்பட்டது. பதில் அளித்தவர்களில் பெரும்பாலோர், குற்ற வழக்கு தொடர்பாக தாங்கள் புகார் அளிக்கவில்லை, ஏனெனில் சட்ட வழக்கில் தாங்கள் சிக்கிக்கொள்ள விரும்பவில்லை அல்லது பதிலடி கொடுப்பார்கள் என்று அஞ்சினர்.

இந்தியாவில் குற்றங்கள் குறித்து நம்பகமான மதிப்பீடுகளைக் கொண்டிருக்க, நாடு தழுவிய வீட்டு அளவிலான கணக்கெடுப்பின் அவசியத்தை புள்ளி விவரங்கள் மற்றும் திட்ட அமலாக்கத்துறை அமைச்சகக் குழு வெளிப்படுத்தியது. கணக்கெடுப்புக்கு தேசிய மகளிர் ஆணையம் போன்ற பல்வேறு சட்டரீதியான அமைப்புகளில் இருந்து தரவுகள் தொகுக்கப்பட்டு, சரியான இடைவெளியில் கிடைக்க வேண்டும் என்று, அந்த அறிக்கையில் தெரிவிக்கப்பட்டுள்ளது.

நேஷனல் க்ரைம் ரெக்கார்ட்ஸ் பீரோ தவிர, கிராமப்புற மற்றும் நகர்ப்புறங்கள், மத மற்றும் சாதிகள் என, 15 முதல் 49 வயதுக்குட்பட்ட பெண்கள் மற்றும் சிறுமிகளுக்கு எதிரான வன்முறை பற்றிய தரவுகளை தேசிய குடும்ப சுகாதார ஆய்வு வெளியிடுகிறது. இருப்பினும், 15 வயதிற்கு குறைவான பெண்கள் அல்லது 49 வயதுக்கு மேற்பட்ட பெண்களுக்கு எதிரான இத்தகைய வன்முறைகள் குறித்து எந்த தகவலும் தேசிய குடும்ப சுகாதார ஆய்வில் இல்லை. வன்முறையின் தீவிரத்தை கணக்கெடுப்பு குறிப்பிடவில்லை.

இருப்பினும், பெண்களுக்கு எதிரான பாலியல் வன்முறை வழக்குகளில் 99.1% பதிவாகவில்லை. காரணம், பெரும்பாலான சந்தர்ப்பங்களில் குற்றவாளி பாதிக்கப்பட்டவரின் கணவராக இருப்பதாக, லைவ்மிண்டின் நேஷனல் க்ரைம் ரெக்கார்ட்ஸ் பீரோ மற்றும் தேசிய குடும்ப சுகாதார ஆய்வு தரவின் 2018 பகுப்பாய்வு கண்டறியப்பட்டுள்ளது.

குற்றவாளிகள், பாதிக்கப்பட்டவரின் தற்போதைய கணவராக இல்லாத பாலியல் வன்முறை வழக்குகளில், சுமார் 15% மட்டுமே பதிவாகின்றன.

உங்களின் கருத்துகளை வரவேற்கிறோம். கருத்துகளை respond@indiaspend.org. என்ற முகவரிக்கு அனுப்பலாம். மொழி, இலக்கணம் கருதி அவற்றை திருத்தும் உரிமை எங்களுக்கு உண்டு.