மரம் மறுநடவு ஏன் பசுமைச்சுவர் இழப்பை ஈடுசெய்ய முடியாது

புதுடெல்லியில் 40 பெரிய திட்டங்களுக்கு, மரம் மறுநடவு நிபந்தனைகளுடன் ஒப்புதல் அளிக்கப்பட்டுள்ளது, இதில் மத்திய விஸ்டா திட்டம் உட்பட அதிக எண்ணிக்கையிலான மரங்கள் வெட்டப்பட வேண்டும். டெல்லி அரசின் டிசம்பர் 2020 மரம் மறு நடவு கொள்கையின்படி, கட்டிட நிறுவனங்கள், அவை அகற்றும் மரங்களில் 80%ஐ மறுநடவு மூலம் நட வேண்டும்.

மரங்களை மறுநடவு செய்தல், அதாவது காடுகளை அழிப்பதை எதிர்ப்பதற்கான ஒரு நடவடிக்கையாக வேருடன் பிடுங்கப்பட்ட மரங்களை மீண்டும் நடவு செய்யும் செயல்முறை, பல்வேறு திட்டங்களுக்கு பெரிய பசுமைப் பகுதிகளை இழக்கும் டெல்லிக்கு பயனுள்ளதா? சாத்தியமில்லை என்று கூறும் சுற்றுச்சூழல் ஆர்வலர்கள், இந்தியாவில் பல பெரிய திட்டங்களைச் சுட்டிக்காட்டி, மரம் மறு நடவு தோல்வியடைந்ததை சுட்டிக் காட்டுகின்றனர். இங்கே சில உதாரணங்கள்:

• மும்பையின் கடைசி பசுமையான நுரையீரல் என்று குறிப்பிடப்படும் ஆரே காலனியில், 2017 ஆம் ஆண்டில் 2,141 மரங்கள் வரை வெட்டப்பட்டன, மும்பையின் மெட்ரோ 3 திட்டங்கள், நகரின் தெற்கு முனையை அதன் மேற்கு புறநகர்ப் பகுதிகளுடன் இணைக்கிறது. பம்பாய் உயர் நீதிமன்றம் 2019 ஆம் ஆண்டில், மறுநடவு செய்யப்பட்ட மரங்களை ஆய்வு செய்ய ஒரு உண்மை கண்டறியும் குழுவை நியமித்தது, மேலும் அந்த ஆய்வில் 60% க்கும் அதிக மரங்கள் இறந்துவிட்டதை குழு கண்டறிந்தது.

• வடக்கு மற்றும் தெற்கு நாக்பூரை இணைப்பதற்காக கட்டப்பட்ட மெட்ரோ பாதைக்காக, 2019 இல் 21 மரங்களை மறு நடவு செய்யப்பட்டன. இவற்றில் எதுவும் பிழைக்கவில்லை. இந்த தோல்வி இருந்தபோதிலும், சாலை, ரயில் மற்றும் மெட்ரோ டெர்மினல்களை ஒருங்கிணைப்பதற்காக ரூ .1,053-கோடி இன்டர்மோடல் ஸ்டேஷன் போன்ற உள்கட்டமைப்பு திட்டங்களை, இந்த நகரம் திட்டமிட்டுள்ளது, இதற்காக 1,940 மரங்கள் மறு நடவு செய்யப்படும்.

சுற்றுச்சூழல் பாதிப்பிற்காக, குறைந்த சிந்தனையுடன் திட்டமிடப்பட்ட நகர்ப்புற திட்டங்கள், இந்திய நகரங்களில் மரங்களால் போர்த்த தவறவிட்டன, இதற்கு இந்தியா முழுவதும் உதாரணங்கள் உள்ளன: ஒரு காலத்தில், இந்தியாவின் பசுமையான நகரங்களில் ஒன்றாக இருந்த நாக்பூர், 1999 மற்றும் 2018ஆம் ஆண்டுக்கு இடையில் உள்கட்டமைப்பு திட்டங்களால், 40 சதுர கிலோமீட்டருக்கு மேல், அதன் பசுமையை இழந்துவிட்டது-நகரத்தின் 31% பகுதியில் இருந்து அதன் பசுமை பரப்பு 21% ஆக குறைத்தது- என்று 2019 ஆய்வு கூறியது. மும்பையின் கிட்டத்தட்ட 94% பரப்பு, 40 வருடங்களில் கான்கிரீட் காடுகளாக மாற்றப்பட்டுள்ளன மற்றும் பெருநகரமானது ஒவ்வொரு நான்கு நபர்களுக்கும் ஒரு மரத்தை மட்டுமே கொண்டுள்ளது என்று கடந்த 2018 ஆம் ஆண்டு பிஎம்சி மரம் கணக்கெடுப்பு தெரிவிக்கிறது. பெங்களூருவில் 1.47 மில்லியன் மரங்கள் (2013 புள்ளிவிவரங்கள்) உள்ள நிலையில், ஒரு நபருக்கு 0.166 மரங்கள் உள்ளன. சிறப்பான மரம்-மனித விகிதம் என்பது 8: 1 ஆகும்.

இந்தியாவின் மொத்த மர பரப்பு 95,027 சதுர கிமீ ஆகும். இது, அதன் புவியியல் பரப்பளவில் வெறும் 2.89% என்று, 2019 இந்திய மாநில வன அறிக்கை தெரிவிக்கிறது.

இந்தியாவில், மரம் மறுநடவு நடவடிக்கை பயனுள்ளதாக இல்லை, ஏனெனில் ஒரே மாதிரியான செயல்முறை இல்லை மற்றும் தோல்விக்கான அபராதம் போதுமானதாக இல்லை என்று நிபுணர்கள் கூறுகின்றனர். "மறு நடவு மோசம் என்பது மட்டும் பிரச்சனை அல்ல, மறுநடவு பற்றி பேசும் அதிகாரிகள், மரங்களின் உயிர்வாழ்வு பற்றி அரிதாகவே தீவிரம் காட்டுகின்றனர்," என்று, மும்பையின் ஆரே பகுதியில், பூர்வீக மரங்களுடன் காடு வளர்க்கும் ஆர்வலர் குழுவான ரீவைல்டிங் ஆரேயின் சஞ்சீவ் வல்சன் கூறினார். "மறு நடவில் இறந்த மரங்களுக்காக எந்தன் தண்டனைஅயும் தரப்படுவதில்லை" என்றார்.

உதாரணமாக, நாக்பூர் மாநகராட்சியில் ஒவ்வொரு மரத்திற்கும் மறுநடவு செய்வதற்கு, திட்ட அதிகாரிகளிடம் ரூ .5,500 பாதுகாப்பு வைப்புத்தொகையை வசூலிக்கிறது ஆனால் இது ஒரு தடையாக வேலை செய்யவில்லை என்று, நகரத்தை அடிப்படையாகக் கொண்ட இலாப நோக்க அமைப்பான, கிரீன் விஜில் சேர்ந்த சுற்றுச்சூழல் ஆர்வலரான கவுஸ்தவ் சட்டர்ஜி கூறினார். "மர பராமரிப்பு மற்றும் அறிவியல் ரீதியாக மறுநடவு முறையில் பணத்தை முதலீடு செய்வதை விட, திட்ட அதிகாரிகள் வைப்புத்தொகையை கைவிட விரும்புகிறார்கள்," என்று அவர் கூறினார்.

ஒவ்வொரு மரமும் 30 பூச்சியினங்களை ஆதரிக்கிறது என்றாலும் பரவலாக வெட்டப்படுகிறது

கடந்த 2020 ஜனவரியில், அப்போதைய தலைமை நீதிபதி எஸ்.ஏ. போப்டே, சுற்றுச்சூழலுக்கு மரங்களின் இழப்பை மதிப்பீடு செய்ய நிபுணர் குழுவை கேட்டார். குழு, மதிப்பீடு செய்யும் போது, ​​ஒரு மரத்தின் பொருளாதார மதிப்பை ரூ .74,500 என மதிப்பிடப்பட்டது. 100 ஆண்டுகளுக்கும் மேலான ஆயுட்காலம் கொண்ட பாரம்பரிய மரங்களின் மதிப்பு 1 கோடிக்கும் அதிகமாக இருக்கும். "நுண்ணூட்டச்சத்துக்கள் மற்றும் உரம் ஆகியவற்றின் செலவுகளைச் சேர்க்கும்போது, ​​உயிருள்ள மரங்கள் பெரும்பாலும் அவர்கள் வீழ்த்தப்பட்ட பெரும்பாலான திட்டங்களின் நன்மைகளை விட அதிகமாக இருக்கும்" என்று குழு குறிப்பிட்டது.

காற்று மாசுபடுத்துவதை வடிகட்டுதல், மண் அரிப்பை எதிர்த்துப் போராடுவது, ஆக்ஸிஜனை வழங்குதல் மற்றும் நிலத்தடி நீரை செறிவூட்டுதல் தவிர, மரங்கள் அனைத்து வகையான உயிரினங்களையும் ஆதரிக்கின்றன. ஒரு ஒற்றை மரம், 30 உயிரினங்களை ஆதரிக்கிறது என்று, தாவரவியலாளரும், மும்பை மாநகராட்சியின் மர ஆணையத்தால் அமைக்கப்பட்ட நிபுணர் குழுவின் முன்னாள் உறுப்பினருமான சசிரேகா சுரேஷ்குமார் கூறினார். "ஒரு மரத்தின் மதிப்பு மற்றும் அது ஆதரிக்கும் சூழலியல் என்ன என்பதை நாம் புரிந்து கொள்ள முடியவில்லை," என்று அவர் கூறினார்.

தோட்ட நிபுணர் பிராச்சி மஹூர்கர், நாக்பூர் அஜ்னி வனத்தின் 446 ஏக்கர் பரப்பளவில் 7,000 க்கும் மேற்பட்ட மரங்களின் வாழ்விட கணக்கெடுப்பை மேற்கொண்டார், இது நகரத்தில் எஞ்சியிருக்கும் சில பசுமையான திட்டுகள் மற்றும் வளரும் பல்லுயிர் வாழ்விடங்களில் ஒன்று, மற்றும் 56 வகையான மரங்கள் உள்ளன, அவற்றில் 39 பூர்வீகம் சராசரியாக 40 வயது கொண்ட இனங்கள் என்று கண்டறிந்தது. அஜ்னி வனம், இப்போது நாக்பூரில் உள்ள இன்டர்மோடல் ஸ்டேஷனின் தளமாக அமைக்கப்பட்டுள்ளது.

கடற்கரை அமைப்பதற்காக, 373 மரங்களை வெட்ட வேண்டிய தேவை இருந்த நிலையில், அதில் 332 மரங்களை மறுநடவு செய்ய பி.எம்.சி.-யின் மர ஆணையம் அனுமதித்ததாக கூறப்படுகிறது. மேலும் 1,719 மரங்கள் வெட்டப்பட உள்ளன, மேலும் ஜோகேஸ்வரி-விக்ரோலி இணைப்பு சாலை விரிவாக்கம் மற்றும் மெட்ரோ வழித்தடங்கள் கட்டுமானத்திற்காக 1,166 மறு நடவு செய்யப்பட உள்ளது.

புறக்கணிப்பால், மறு நடவு செய்யப்பட்ட மரங்களில் 60% இறந்தன

கடந்த 2017 ஆம் ஆண்டில், மும்பையில் மெட்ரோ-3 ஐ உருவாக்க, ஆரே காடுகளில் 2,141 மரங்களை வெட்டுவதற்கு எதிரான போராட்டங்கள் கூடிவந்தபோது, ​​சமூக ஊடகங்கள் "நீங்கள் மரங்களை வேறு இடத்திற்கு இடமாற்றம் செய்யும்போது, அவற்றை ஏன் வெட்ட வேண்டும்?" என்ற வாதங்கள் பரபரப்பாக நடைபெற்றன. மறு நடவு செய்ய 1,072 மரங்கள் அங்கீகரிக்கப்பட்டன மற்றும் மும்பை மெட்ரோ ரயில் கார்ப்பரேஷன் லிமிடெட் (MMRCL - எம்எம்ஆர்சிஎல்) அவற்றை நடவு செய்ய, ஒரு மரத்திற்கு ரூ .50,000 வீதம் ரூ .5.36 கோடியை ஒதுக்கீடு செய்தது.

ஆனால், மும்பை உயர் நீதிமன்றத்தால் நியமிக்கப்பட்ட குழு, தனது 2019 அறிக்கையில், மெட்ரோ- 3 திட்டத்திற்காக மறுநடவு செய்யப்பட்ட மரங்களில் 60% க்கும் அதிகமானவை இறந்துவிட்டதாக முடிவுக்கு வந்தது. 2017ஆம் ஆண்டில் இருந்து நடப்பட்ட 1,462 முழுமையாக வளர்ந்த மரங்களை அது ஆய்வு செய்தது; அவற்றில் 759 பேர் இறந்துவிட்டன அல்லது இறந்து கொண்டிருந்தன. இந்த அறிக்கை, போதுமான மர பராமரிப்பு மற்றும் அறிவியல் மாற்று முறைகள் இல்லாததைக் கண்டறிந்தது.

சுற்றுச்சூழல் ஆர்வலரும், வழக்கின் மனுதாரருமான சோரு பதேனா, உயர் நீதிமன்றக் குழுவுடன் கள வருகைகளுக்குச் சென்றார். "அவர்கள், ஒரு ஆர்போரிஸ்ட்டை (மரங்களை நடும், பராமரிக்கும் மற்றும் பராமரிக்கும் அறிவியலில் பயிற்சி பெற்ற ஒரு நபரை) ஒரு மாதத்திற்கு ரூ. 21 லட்சத்திற்கு வேலைக்கு அமர்த்தியுள்ளதாகவும் அவர்கள் கூறியுள்ளனர்," என்று அவர் கூறினார். குற்றச்சாட்டுகள் குறித்து கருத்து தெரிவிக்க, செப்டம்பர் 16 அன்று, எம்எம்ஆர்சிஎல் -க்கு மின்னஞ்சல் அனுப்பினோம். எங்களுக்கு பதில் கிடைத்தால், இக்கட்டுரையை புதுப்பிப்போம்.

ஒப்பந்தக்காரர்கள் மாற்றுப் பணிகளைப் பயன்படுத்தி பணம் சம்பாதிப்பதாக, ஆரே ஆர்வலர் வல்சன் குற்றம் சாட்டினார். மும்பை மெட்ரோ- 3 திட்டத்தின் போது, ​​புதிய மரங்களுக்கு இடமளிக்கும் வகையில், நடவு செய்யப்பட்ட மரங்களை ஒப்பந்ததாரர்கள் பிடுங்குவதை கவனித்ததாக, அவர் கூறினார். "வரும் ஒவ்வொரு மரத்திற்கும் அவர்கள் பணம் பெறுகிறார்கள். மேலும், விறகு விற்று பணம் சம்பாதிக்கப்படுகிறது," என்று அவர் கூறினார்.

நம்பகத்தன்மை ஆய்வு இல்லை

மற்ற நகரங்களிலும், மரம் மறுநடவுமுறை வெற்றிகரமாக இல்லை.

டெல்லியில், அதன் தென்மேற்குப் பகுதியை பக்கத்து பகுதியாக கொண்ட குருகிராமுடன் இணைக்க, துவாரகா விரைவு சாலை என்ற திட்டம், 2016 இல் முன்மொழியப்பட்டது. இதற்கான பாதையில் , 3,500 மரங்களை மறுநடவு செய்யப்பட வேண்டும் என்ற நிபந்தனையின் பேரில், இரண்டு ஆண்டுகளில் 6,500 மரங்களை வெட்ட வேண்டும். ஆனால், மறுநடவுக்கான அனுமதி அதன் நம்பகத்தன்மையை மதிப்பீடு செய்யாமல் வழங்கப்பட்டதாக, டெல்லியை தளமாகக் கொண்ட அரசு சாரா அமைப்பான கலாச்சாரம், பாரம்பரியம், சுற்றுச்சூழல், மரபுகள் மற்றும் தேசிய விழிப்புணர்வை ஊக்குவிக்கும் சங்கம் (SP-CHETNA) என்று குற்றம்சாட்டியதோடு, 2019ல் தேசிய பசுமை தீர்ப்பாயத்தில் முறையிட்டது. மறுநடவு செய்யப்பட்ட மரங்கள் உயிர்வாழ்வதை கண்காணிக்க, டெல்லி வனத்துறைக்கு தீர்ப்பாயம் உத்தரவிட்டது.

அதே திட்டம் தொடர்பாக, டெல்லியின் சுற்றுச்சூழல் அமைச்சர் கோபால் ராய், இந்த திட்டத்தின் கீழ் அதிக எண்ணிக்கையிலான மரங்கள் மறுநடவு செய்யப்பட்டதாக கூறினார், மேலும் "அவற்றில் பலவற்றிற்கு பிழைக்கவில்லை" என்று ஒப்புக்கொண்டார், ஏனெனில் அவை பலவற்றிற்கு, "கோவிட் காரணமாக மாதங்கள்" தண்ணீர் வழங்க முடியவில்லை.

இதேபோல், நகரின் கிழக்கு மற்றும் மேற்கு வழித்தடங்களை இணைக்கும் பெங்களூரு மெட்ரோவின் முதல் பகுதிக்கு, பெங்களூரு மாநகராட்சி 1,428 மரங்களை வெட்டியதாகக் கூறப்படுகிறது. பரிசோதனை முயற்சியாக மறுநடவு செய்யப்பட்ட 10 மரங்களில், மூன்று மட்டுமே உயிர் பிழைத்தன.

முறைமை இல்லை

இங்கிலாந்து மற்றும் ஹாங்காங் போன்ற நாடுகளால் -மற்றும் ஆராய்ச்சி அமைப்புகள்-வரையறுக்கப்பட்ட வழிகாட்டுதல்கள், ஒரு முறையான அணுகுமுறையைப் பற்றி பேசுகின்றன, அதில் மரங்களை மறுநடவு செய்வதில் சிறப்பாகச் செய்யக்கூடியவை மற்றும் செய்யாதவைகளாகப் பிரிக்க வேண்டும். அவர்கள் கட்டளையிடும் செயல்முறையானது, அவற்றின் வேர் பந்துகளைத் தனிமைப்படுத்த, மரங்களைத் தோண்டி மற்றும் கிளைகளை களைவதில் உள்ளடக்கியது. மரங்கள் மறுநடவு மற்றும் இடமாற்றத்தின் போது அவற்றின் தாய் மண்ணை எடுத்து புதிய இடத்தில் இட்டு, 'பழக்கப்படுத்தப்பட வேண்டும்' மற்றும் நீரேற்றத்தை உறுதிப்படுத்த, முதல் 12 மாதங்களுக்கு மரம் மீது வழக்கமான கண்காணிப்பு அவசியம்.

இருப்பினும், இந்தியாவில் மரம் இடமாற்றம் மற்றும் மறுநடவு செய்வதற்கான நடைமுறைகள் எதுவும் இல்லை, மேலும் கட்டுமான நிறுவனங்கள் மற்றும் ஒப்பந்தக்காரர்களிடமே இதற்கான வேலை பெரும்பாலும் விடப்படுகிறது. மகாராஷ்டிரா (நகர்ப்புறப் பகுதிகள்) மரங்களின் பாதுகாப்பு மற்றும் பாதுகாப்புச் சட்டம்- 1975, உதாரணமாக, "புதிய சாலைகளை அமைப்பதன் மூலம் தேவையான மரங்களை நடவு செய்வது அல்லது ஏற்கனவே உள்ள சாலைகளை விரிவுபடுத்துதல்" பற்றி பேசுகிறது, ஆனால் எந்த செயல்முறையையும் குறிப்பிடவில்லை.

பிஎம்ஆர்சிஎல் (BMRCL) நடத்திய கண்மூடித்தனமான மரங்களை வெட்டுவதற்கு எதிராக, பெங்களூரு சுற்றுச்சூழல் அறக்கட்டளை (BET) என்ற அரசு சாரா அமைப்பு தாக்கல் செய்த பொது நல வழக்கை விசாரித்த கர்நாடக உயர் நீதிமன்றம், இடமாற்றத்திற்கான இடங்களைத் தேர்ந்தெடுக்க ஒரு குழுவை அமைத்தது மற்றும் மாற்று மற்றும் பின் பராமரிப்புக்காக தனி பட்ஜெட்டுகளுக்கு உத்தரவிட்டது. ஆனால் மாநிலத்தில் உள்ள திட்டங்கள் முழுவதும் ஒரே மாதிரியாக விண்ணப்பிக்க உத்தரவுகள் குறியிடப்படவில்லை.

டெல்லி மரம் மறுநடவு கொள்கையின்படி, நிபுணர்கள் கொண்ட குழு, ஏஜென்சிகள், மறு நடவு மேற்கொள்ளும். டெல்லி பல்கலைக்கழகத்தின் சுற்றுச்சூழல் ஆய்வுகளுக்கான பள்ளி பேராசிரியர் சிஆர் பாபு, இந்தக் குழுவில் உறுப்பினராக உள்ளார். "மாற்று வாய்ப்பு இல்லாதபோது மட்டுமே மறுநடவு செய்யப்படுவதை நாங்கள் உறுதி செய்கிறோம்," என்று அவர் கூறினார். "அனைத்து வகையான திட்டங்களுக்கும், இந்த வரிசை செய்யப்பட்ட ஏஜென்சிகள், மரம் இடமாற்றத்திற்கான தொழில்நுட்ப விவரக்குறிப்புகளைப் பின்பற்றுகின்றன" என்றார்.

தாவரவியலாளர் சசிரேகா சுரேஷ்குமார், 2019 இல் பிஎம்சியின் மர ஆணையத்தில் நிபுணர் குழுவின் உறுப்பினர் பதவியை ராஜினாமா செய்தார். மெட்ரோ 3 திட்டத்திற்காக பாதுகாப்பாக இடமாற்றம் செய்ய முடியாத அல்லது மாற்ற முடியாத மரங்களை அடையாளம் கண்டு அறிக்கை சமர்ப்பிக்கப்பட்டுள்ளது என்றார். "இது அதிகாரிகளால் ஏற்றுக்கொள்ளப்படவில்லை" என்று அவர் கூறினார்.

மறுநடவு செய்வதில், நாட்டு மரங்கள் சிறந்த வெற்றி விகிதத்தைக் கொண்டிருந்தாலும், பூர்வீகமற்ற வெளிநாட்டு மரங்கள் அதிகம் மறு நடவு முறையில் இடமாற்றம் செய்யப்படுவதாக, வல்லுநர்கள் கூறினர். "ஆக்கிரமிப்பு இனங்கள் பெரும்பாலும் பூர்வீக இனங்களை மிஞ்சும், மண்ணின் கலவை மற்றும் நுண்ணுயிர் சமநிலையை மாற்றும்" என்று சுரேஷ்குமார் கூறினார். 2011 ஆம் ஆண்டின் ஆய்வுக் கட்டுரை, இந்தியா தனது சொந்த வனப் பரப்பில் 80% ஆக்கிரமிப்பு அயர்பண்புகளால் இழந்துவிட்டது என்பதை வெளிப்படுத்தியது. "இது இயற்கையில் ஏற்றத்தாழ்வை ஊக்குவிக்கிறது," என்று அவர் கூறினார்.

மறுநடவு இடமாற்றம் தீர்வல்ல

பெரிய அளவிலான மரங்களை வெட்டுவதற்கான தீர்வாக, அவற்றை இடமாற்றம் செய்து மறு நடவு செய்வதை, பசுமை ஆர்வலர்கள் இனி ஆதரிக்க மாட்டார்கள்.

"50-60 வருடங்களாக நின்று கொண்டிருந்த ஒரு மரத்தை வெட்டுவதை எதுவும் நியாயப்படுத்த முடியாது. ஒரு மரக்கன்று தன்னை நிலைநிறுத்தி அதன் வாழ்விடத்தை மீண்டும் உருவாக்க. அதிக நேரம் எடுக்கும்" என்று, கல்ப விருக்‌ஷம் என்ற, சுற்றுச்சூழல் நடவடிக்கை குழுவின் நீமா பதக் ப்ரூம் கூறினார்.

மும்பையில், புயலால் வேரோடு சாய்ந்த மரங்களை நடவு செய்த ஆர்வலர் வல்சன், இந்த செயல்முறையை அதிகாரிகள் எப்படி அணுகுகிறார்கள் என்பதை விமர்சிக்கிறார்: "இந்த அதிகாரிகள் நடவு செய்த விதத்தில், அவர்கள் ஒரு ஷாட்டில் ஒரு தவணையில் ஒரு மரத்தை கொல்வது போல் உள்ளது" என்றார்.

நிலையான வளர்ச்சிக்காக வாதாடும் பர்யவரன் பிரேர்னா விதர்பாவின் ஆர்வலர் அனசூயா சப்ராணி, நாக்பூரின் அஜ்னி வனம் பகுதியில் ரூ. 1,053 கோடி இடைநிலை நிலையத்திற்கு எதிராக மரங்கள் வெட்டப்படுவதற்கு எதிராக, அவரும், அவருடைய சக ஆர்வலர்களும் பல போராட்டங்களை நடத்தியுள்ளனர். அவர் சார்பில் இதற்கு எதிராக மனுக்கள் மற்றும் நீதிமன்ற வழக்குகளை தாக்கல் செய்துள்ளனர். விரைவில், நவம்பர் 2020 இல், இந்திய தேசிய நெடுஞ்சாலை ஆணையம், இடைநிலை நிலையத்தின் முதல் கட்டத்தின் திட்ட மேம்பாட்டாளர், திட்டத்திற்காக வெட்டப்பட வேண்டிய 1,940 மரங்கள் மறுநடவு முறையில் இடமாற்றம் செய்யப்படும் என்று அறிவித்தார். ஆனால் ஆர்வலர்கள் இதற்கு எதிராக உள்ளனர்.

"சில மாதங்களுக்கு முன்பு [தொற்றுநோய் எழுச்சியின் போது] நாம் ஆக்ஸிஜனுக்காக போராடிக் கொண்டிருந்தோம், இப்போது நாம் ஆக்ஸிஜனின் ஆதாரங்களை வெட்டுகிறோம், நாம் என்ன கற்றுக்கொண்டோம்?" என்று, சப்ராணி கூறினார்.